„Јас не сокрив имот бидејќи со анкетниот лист што го приложив до ДКСК, јас испратив и допис во кој ја наведов фирмата која се споменува, каде мојот сопруг е 40 проценти содружник и е поведена стечајна постапка“, вели Црвенковска за наводите дека не го пријавила на време имотот во Антикорупциската комисија
Откако вчера во јавноста излезе информацијата дека претседателката на Судксиот совет Павлина Црвенковска не го пријавила на време имотот во Антикорупциската комисија, за што ѝ следува глоба од 150 евра, Црвенковска вели дека не ја пријавила фирмата во која нејзиниот сопруг е содружник, бидејќи фирмата е во стечај.
Таа рече оти очекува да добие информација од Државната комисија за спречување на корупцијата (ДКСК) и во жалбата до нив ќе каже дека не сокрила никаков имот.
„Дали сум дала нецелосни податоци? Во секој случај ќе се произнесам кога ќе го добијам, кога најверојатно ќе имам право на жалба и кога ќе го кажам тоа што имам да го кажам. Јас не сокрив имот бидејќи со анкетниот лист што го приложив до ДКСК, јас испратив и допис во кој ја наведов фирмата која се споменува, каде мојот сопруг е 40 проценти содружник и е поведена стечајна постапка. Наведов по мое толкување и толкување на правници кои се бават со трговско право дека немам обврска во анкетен лист да пријавам имот како сопственост, кој всушност не е сопственост, бидејќи до моментот на отворањето на стечајна постапка со стечајниот имот управува стечајниот управител“,
истакна Црвенковска.
Таа рече дека ниту сокрила некој имот, ниту тоа и било целта, зашто, како што рече, во спротивно не би ја информирала Антикорупциска со допис за конкретниот имот за кој станува збор.
„Дека не сум го ставила во анкетниот лист им објаснив од која причина не го ставам, а не можам да ставам нешто за сопственост, која не е сопственост и за таа фирма е затворена стечајната постапка“,
додаде Црвенковска.
Вчера Алсат објави дека Црвенковска не го пријавила навреме имотот во Антикорупциска, за што ѝ следува глоба од 150 евра. При собирањето на документите за имотот на првиот човек на судскиот совет, констатирани се и низа недоследности во податоците, а за ова Антикорупциска ќе го извести обвинителството.
„Во колегиумот спроведена е постапка за издавање на констатираниот прекршок и издавање мандатен налог за плаќање глоба за недоставување на анкетниот лист навреме, а оваа постапка ќе продолжи. Има недоследности во податоците истакнати во анкетниот лист, има фирми кои се во сопственост на блиски лица, брачниот другар, а сомнежите што ги констатиравме во однос на приватни и правни лица веќе не се наша надлежност. Ние го пронајдовме тоа додека прибиравме информации. За она што го констатиравме при нашата истрага и прибирањето информации ќе го известиме Јавното обвинителство“,
рече Нури Бајрами, член на антикорупциска комисија.