Саити информираше дека од вкупно собраните средства, досега се исплатени над 107,4 милиони денари, додека на единствената солидарна сметка за исплата остануваат уште 49 милиони денари
Генералниот секретар на македонскиот Црвен крст, Саит Саити, денеска на панел дискусијата „Кочани е нашиот приоритет“ рече дека имаат ангажирано меѓународна ревизорска куќа, која ќе направи ревизија на сметката за донации за трагедијата во Кочани, што од независен пристап и аспект Саити рече дека ќе направи детална анализа на приливите, одливите, начините на исплата и се останато „за да останеме максимално транспарентни и отчетни“.
Целта, како што појасни Саити, е Црвениот крст да остане и понатаму доверлив партнер и транспарентно со оглед на големата доверба што ја доби, посочувајќи дека 158 милиони денари се околу 2,6 милиони евра, средства што Црвениот крст никогаш досега не мобилизирал.
„Во однос на приливите, мора да кажам дека веќе се намалува интересот за донирање. Сметките на Црвениот крст се и понатаму отворени, тоа што ќе го направиме е до крајот на месецот. Се надевам дека, каде и да е, наскоро, ќе можеме условно кажано да се ослободиме од овие пари. Црвениот крст веќе ангажираше меѓународна ревизорска куќа која ќе направи ревизија на таа сметака со датум од 17 март, заклучно со евентуално 15 јуни или кој ден ќе биде крајниот“,
рече Саити.
Тој рече дека сите инволвирани во справувањето со кризата по пожарот во Кочани застанале зад иницијативата хуманитарната помош за повредените да се акумулира на едно место и да се дистрибуира според потребите.
Саити информираше дека од вкупно собраните средства, досега се исплатени над 107,4 милиони денари, додека на единствената солидарна сметка за исплата остануваат уште 49 милиони денари.
Тој додаде дека средствата за поддршка биле исплатени во шест наврати, кон три категории на корисници.
Исплатата, како што рече Саити, започнала за 60 семејства на починатите, но за жал, рече тој, бројот се зголемил на 63 семејства.
„Вкупно исплатените средства за оваа категорија изнесуваат 52 038 593 денари“,
рече тој.
За 116 повредени лица лекувани во странство Саити рече дека биле исплатени средства во износ од 44 163 258 денари.
За 71 лице кое се лекувало во Северна Македонија, била извршена една исплата во износ од 11 247 000 денари.
„Збирно, сите овие исплати изнесуваат 107 449 000 денари“,
рече Саити.
Тој додаде дека преостанатите 49 012 634 денари што се на сметката на Црвениот крст ќе бидат исплатени по согледувањето на резултатите од евалуацијата на повредените и нивната здравствена состојба.
Тој нагласи дека нема да се исплаќа линеарна сума, бидејќи секој пациент има различни потреби, тежина на повредите и различна прогноза за нивното лекување.
„Не сите имаат иста потреба и иста тежина на повредите и исти прогнози во однос на нивното лекување. Сакајќи тоа да го направиме чекаме да бидат финални тие резултати и врз основа на тоа Црвениот крст веднаш ќе пристапи на тоа луѓето да ги добијат и користат средствата“,
додаде Саити.