Пожарот кај Буковиќ, Раовиќ во Општина Сарај е сѐ уште активен, каде што гори мешана шума. Во текот на вчерашниот ден беше извршено комплетно пребарување и догасување на постојните жаришта, а како поддршка се приклучи и црногорскиот хеликоптер, кој со 12 налети испушти голема количина на вода. Но, најверојатно, се работи за специфично земјиште кое и покрај 17-те тони вода, кои вчера беа фрлени врз овој пожар, не е целосно изгаснат, соопшти на претпладневната прес-конференција Надица В’чкова, портпаролката Центарот за управување со кризи (ЦУК).
Сѐ уште се активни пожарите и кај селото Горно Мелничани во Центар Жупа, во атарите на селата Ракле, Никодин и Топлица во Општина Прилеп.
Пожарот помеѓу селата Барово и Вешје во Општина Демир Капија, каде што гори нискостеблеста мешана шума, е повторно активен и во текот на вчерашниот ден беше ставен под контрола. Утрово од 5 часот на терен интервенираат пожарникари од Територијалната противпожарна единица од Неготино, ШС Демир Капија, како и група од месното население. Повеќе информации околу состојбата со овој пожар од ЦУК најавија на попладневната прес-конференција.
Состојбата со пожарот кај селото Горно Мелничани е се уште непроменета, односно пожарот е се уште активен. Во гаснењето на пожарот во атарот на селото Горно Мелничани во Општина Центар Жупа, како што јави дописничката на МИА од Дебар, од утрово вклучени се два хелкоптера, по барање на градоначалникот Аријан Ибраим, поради ширењето на пожарот кој до сега има опожарено над 15 хектари високостеблеста букова шума. Пожарот, кој вчера беше ставен под контрола повторно се распламти на што влијаеше и ветерот, осебно во ноќните часови.
Во неговото гаснење се вклучени и над 100 лица, од противпожарната единица во Дебар и Гостивар, припадници на полицијата, специјалната полициска едница за брзи интервенции, од подружницата на „Национални шуми, како вработени од општината“,
изјави за МИА, Џетан Мифтароски, командир на дебарската територијална противпожарна единица.
В’чкова информира дека повторно е активен и пожарот во атарите на селата Ракле, Никодин и Топлица во Општина Прилеп. Гори кракот од село Ракле спрема село Крстец, а рано утрово на терен се испратени едно противпожарно возило и четири пожарникари, како и пет вработени од ШС Црн бор од Прилеп. Пожарот е на тешко пристапен терен.
Според ЦУК, ставени се веќе под контрола пожарите помеѓу селото Црвена Вода и Планинарскиот дом Китка во Општина Студеничани, и пожарот на планината Кожув кај местото викано Круша, Гевгелиско, а утрово на терен е излезена екипа на Територијалната противпожарна единица од Гевгелија и ШС Кожув