Црна Гора прогласува крај на епидемијата со коронавирусот, одлучи денеска Националното координативно тело, по предлог на Институтот за јавно здравје.
„Ова е резултат на неколкумесечните напори на сите во системот и на нашите граѓани. Ви благодарам за довербата ! Некои мерки ќе бидат укинати, но со оглед на тоа што пандемијата се уште трае, остануваат во сила мерките против импортација на вирусот“,
соопшти Владата на Твитер.
Поминаа 28 дена откако во Црна Гора не се регистрирани нови случаи на коронавирус. Тоа значи дека се исполнети сите услови за официјално да се прогласи крај на епидемијата, јавуваат црногорските медиуми.
„Од вчерашниот пресек на состојбата, завршени се анализите на 133 примероци, меѓу кои немаше нови случаи на инфекција со Ковид-19. Сè уште нема активни случаи“,
објави претходно Институтот за јавно здравје.
Првиот случај на коронавирус во Црна Гора беше регистриран на 17 март.
Имаше вкупно 324 регистрирани случаи, од кои 315 се излекувани, а деветмина пациенти починаа.
Во моментов, 1.064 луѓе се под надзор.