Како причина се наведува зголемениот број новозаразени случаи со коронавирус во Албанија
Црна Гора повторно ја затвора копнената граница со Албанија, поради зголемениот број на нови случаи со ковид -19, соопшти албанското Министерство за Европа и надворешни работи.
Во соопштението се посочува дека овој режим започнува на полноќ на 21 јуни 2020 година, и важи до следната одлука на Главниот кризен штаб во Подгорица.
„Штабот на црногорската влада одлучи да го преразгледа списокот на земји на кои ќе им се дозволи да влезат на нејзината територија, како дел од борбата против пандемијата со коронавирусот. По проценката за состојбата со опасниот вирус во Албанија, донесена е одлуката за повторно затворање на границата со нашата земја“, се вели во соопштението на албанското министерство.
Од оваа одлука се изземаат здравствени работници, медицински истражувачи, лица кои се занимаваат со превоз на стока и друг транспорт, дипломати, персонал на меѓународни организации, воен персонал и хуманитарни работници, специјални категории на патници во транзит и лица на кои им е потребна меѓународна заштита во Црна Гора или од други хуманитарни причини.