Милатовиќ води со 60,5 отсто освоени гласови, додека Ѓукановиќ има 39,5 отсто
На обработени 54,5 отсто од гласовите, проекциите на резултатите од денешниот втор круг од претседателските избори во Црна Гора покажуваат дека кандидатот на движењето „Европа сега“ (ПЕС), Јаков Милатовиќ, е во водство пред кандидатот на ДПС, Мило Ѓукановиќ.
Милатовиќ води со 60,5 отсто освоени гласови, додека Ѓукановиќ има 39,5 отсто.
Ова се проекции на невладината организација Центар за мониторинг и истражувања (ЦЕМИ).
Право на глас на претседателските избори во Црна Гора имаат 542 154 граѓани, а излезеноста во вториот круг, според ЦЕМИ, била 70,5 отсто.
Овие претседателски избори се четврти од обновувањето на независноста и осми од воведувањето на повеќепартискиот систем.