Лидерот на Сириза рече дека иако „претрпеа сериозен изборен пораз“, резултатот главно е „негативен и за општеството и за демократијата“, осврнувајќи се на обезбедениот влез во парламентот на три радикално десничарски партии
За Сириза се затвори голем и креативен историски циклус, циклус на позитивен придонес кон општеството и земјата, истакна лидерот на партијата Алексис Ципрас по денешниот пораз на парламентарните избори во Грција.
Тој потенцираше дека треба да се направат потребните промени за да се отвори, како што рече, нов, уште понадежен циклус.
Ципрас истакна дека партијата ја презема одговорноста за резултатите, а членовите ќе ги донесат потребните одлуки. Во целиот тој колективен процес на реконструкција на партијата, како што рече, тој ќе биде првиот што ќе се стави на располагање на партиските органи за да ја оценат неговата работа.
„Времето, за методично да работиме со цел реконструкција на партијата, не е неограничено. Временскиот период за нашето враќање се европските избори за околу една година од сега. И тоа мора успешно да се направи бидејќи тоа го бараат потребите на граѓаните“,
истакна Ципрас.
Лидерот на Сириза рече дека иако „претрпеа сериозен изборен пораз“, резултатот главно е „негативен и за општеството и за демократијата“, осврнувајќи се на обезбедениот влез во парламентот на три радикално десничарски партии.
Нова демократија со освоени 40,52 отсто од гласовите, 22,68 проценти повеќе од опозициската Сириза, е победник на денешните парламентарни избори во Грција.
Партијата победник доби 158 пратенички места, со што Киријакос Мицотакис ќе може да формира еднопартиска влада.
Мицотакис по победата на партијата изјави дека е задоволен од „сигурното мнозинство“ што го освои и вети дека ќе продолжи со клучните реформи со забрзано темпо.