ГХФ објави дека дистрибуцијата на помош ќе продолжи в четврток и дека ќе работи на појасни упатства и подобра обука за цивилна безбедност
Сите центри за дистрибуција на хуманитарна помош во Газа се затворени денеска откако израелската армија ги прогласи патиштата што водат до локациите за „борбени зони“.
Ова доаѓа по неколку смртоносни инциденти во близина на овие центри, при што најмалку 27 Палестинци беа убиени вчера вечер, според Цивилната заштита на Хамас.
Ова е трет ваков инцидент во последните три дена на пристапите кон локациите на Фондацијата за хуманитарна помош во Газа (ГХФ).
Израелските одбранбени сили (ИДФ) тврдат дека војниците отвориле оган врз сомнителни лица кои отстапиле од означените насоки на движење. Директорот на болницата „Насер“ во Кан Јунис, Атеф Ал-Хут, изјави дека ранетите пристигнуваат со прострелни рани откако израелските сили отвориле оган врз цивили кои чекале помош во Рафах.
Портпаролот на Цивилната заштита, Махмуд Басал, тврди дека нападот бил извршен со тенкови, беспилотни летала и хеликоптери.
Лекар од странска агенција за помош го опиша местото на настанот како „тотален масакр“, наведувајќи дека биле преплавени од бројот на повредени.
Од Фондацијата за хуманитарна помош во Газа, која е мрежа за испорака на помош поддржана од САД и Израел, соопштија дека привремено ги затвораат центрите за работа за ажурирање, организација и подобрување на ефикасноста.
Оваа организација започна со работа минатата недела како замена за системот за дистрибуција на помош на ОН, кој Израел го обвини дека не успеал да спречи пренасочување на помошта кон Хамас – обвинение што ОН го негира.
Новиот модел на ГХФ бара од жителите да пешачат до местата под израелска воена контрола, а потоа да носат кутии од 20 килограми назад во засолништата. Безбедноста ја обезбедуваат американски платеници.
ГХФ објави дека дистрибуцијата на помош ќе продолжи во четврток и дека ќе работи на појасни упатства и подобра обука за цивилна безбедност. Оттаму тврдат дека безбедноста и достоинството на луѓето се на прво место.