Со постојните мерки акцент ставаме на вакцинацијата, а не на алтернативите за влез на настани, порача Филипче
Комисијата за заразни болести и Комитетот за имунизација утре ќе одржат состанок на кој, меѓудругото, ќе ги разгледуваат барањата за дозвола за влез во угостителски објекти и настани со негативен ПЦР-тест, наместо само со вакцинален сертификат.
Сепак, министерот за здравство, Венко Филипче денеска порача дека постојните мерки за невакцинираните лица треба да останат на сила, бидејќи како што рече, целта е граѓаните да се вакцинираат, а не да се бараат алтернативни начини за влез во затворени објекти.
„Бројни барања пристигнуваат. За утре е закажан состанок за Комисиајта за заразни болести и Комитетот за имунизација. Сметам дека овие мерки треба и понатаму да останат исти се додека не се зголеми колективниот имунитет. Досега се вакцинирани 660 000 граѓани од кои 501 000 се ревакцинирани. Со ова темпо ако продолжиме верувам дека до средината на октомври може да стигнеме до милион граѓани што е близу 70 отсто од полнолетните граѓани што е многу важно, имајќи предвид дека почнува школската година. Сакаме овој период, кога се повеќе луѓе ќе бидат во затворени простории да бидеме што е можно побезбедни. Затоа акцент ставаме на вакцинацијата, а не на алтернативите за влез на настани“,
рече Филипче.
Премиерот Заев додаде дека не се воведени бесплатни тестови за влез во угостителските објекти и во шопинг центрите за оние граѓани кои од медицински причини во моментот не можат да се вакцинираат затоа што, како што рече, тоа би можело да предизвика гужви на пунктовите за тестирање и со тоа да се создаде атмосфера на ширење на вирусот.
Одговарајќи на новинарски прашања, Заев рече дека се разгледувала оцијата за бесплатни ПЦР тестови за влез во угостителските објекти и на организирани настани, но оти тоа не е прифатено.
„Имаше дискусија за бесплатен ПЦР тест, дури и дискусија за платен тест или слично пред кафулињата, големите културни настани, одредени други помасовни организациски настани. Причината беше заради тоа што тогаш ќе предизвикаме масовно упатување на луѓето кај пунктовите каде што се прават бесплатните тестови и тоа може да биде атмосфера на ширење на самата зараза. Токму од тие причини, не се даде таа сугестија“,
рече Заев.