Обраќањето е закажано за 1 март, а Белата куќа изрази надеж дека погледот на преполната сала на Претставничкиот дом ќе и помогне на земјата да се врати во нормала по долгата пандемија
Целиот американски Конгрес ќе биде поканет на обраќањето на претседателот Џозеф Бајден за состојбата на нацијата на 1 март, потврдија официјални лица.
Белата куќа изрази надеж дека погледот на преполната сала на Претставничкиот дом, во која ќе има и членови на Сенатот и други официјални лица, ќе ѝ помогне на земјата да се врати во нормала по долгата пандемија.
Членовите на Конгресот нема да можат да носат гости како што правеа претходно, соопшти главниот службеник за спроведување на законот и протоколот на Претставничкиот дом.
Се наведува дека се очекува сите да носат маски.
Претседателката на Претставничкиот дом, Ненси Пелоси, претходно го повика Бајден да се обрати за состојбата на нацијата пред двата дома на 1 март, неколку недели подоцна од вообичаеното, а во изминатите сто години претседателите главно се обраќаа во Конгресот во јануари или февруари.