Министерката за образование и наука, Мила Царовска, вели дека нема конфликт на интерес што фирмата на нејзиниот партнер склучила договор со Град Скопје вреден милион денари, за снимање со дрон на шумски површини во скопската котлина за рана детекција на растителни болести.
На новинарско прашање, Царовска рече дека нема можност да влијае на одлучувањето во локалната самоуправа и дека и пред да биде на функција, фирмата на нејзиниот партнер склучувала договори за јавни набавки со државни институции.
„Согласно дефиницијата за конфликт на интерес тука не постои никаков конфликт на интерес и никаква можност за мое влијание во одлучувањето во локална самоуправа. Дополнително, сакам да ја известам јавноста дека и пред да имам каква и да е функција, тој со својата компанија добивал одредени јавни набавки коишто се транспарентни и електронски секој може да ги провери, од страна на државни и приватни институции. И понатаму ќе продолжи да си аплицира на истите“,
рече Царовска.
Претходно, ВМРО-ДПМНЕ, врз основа на податоци од Бирото за јавни набавки, објави дека Градот клучил договор за снимање со дрон вреден милион денари со фирмата „Флај Кем“, која е во сопственост на партнерот на министерката.
„Предмет на договорот за сопругот на Царовска е услуга за изнајмување на опрема за висинско набљудување на шумски површини во скопската котлина за рана детекција на растителни болести!? Во моменти кога Македонија тоне во здравствена и во економска криза, а се повеќе деца се заболени и имаат последици од короната, во време кога училиште во Скопје се затвори пред налетот на епидемијата, прашање е која е вистинската причина сега, во изборна година Петре Шилегов да спроведува ваков проект? Потребен ли е ваков проект за Мила Царовска да го обезбеди бизнисот на својот сопруг за цела година со еден милион денари?“,
праша Наум Стоилковски, портпарол на ВМРО-ДПМНЕ.
Од Град Скопје, пак, обвинија дека ВМРО-ДПМНЕ креира наводни скандали и ја труе јавноста со измислици.