Ќе се врши психијатриско вештачење на осомничените, па доколку се утврди дека кај нив постоела свест и намера да го лишат од живот оштетениот, можна е преквалификација на делото во убиство, велат од Обвинителството
Основното јавно обвинителство Кавадарци отвори истражна постапка против три лица кои се осомничени дека до смрт претепале 43-годишен маж пред казиното во Кавадарци. Осомничените се гонат за кривично дело – тешка телесна повреда со смртни последици, но од Обвинителството најавуваат и можна преквалификација на делото во убиство.
„Во текот на истражната постапка ќе бидат обезбедени сите докази и ќе се врши психијатриско вештачење на осомничените, па доколку се утврди дека кај нив постоела свест и намера да го лишат од живот оштетениот, можна е преквалификација на делото во убиство“,
велат од Обвинителството.
Двајца од осомничените се на возраст од 27 години и еден е на возраст од 35 години. Според Обвинителството, на 27 август околу 5 часот наутро, тие имале имале вербална расправија со (сега починатиот) во казино во Кавадарци, по што излегле и почнале да го тепаат.
„Физички го нападнале и го удирале со боксови и клоци по целото тело и глава. Оштетениот се обидел да влезе во казиното, но изгубил свест. Со ударите му нанеле повеќе тешки телесни повреди од кои починал“,
велат од Обвинителството.
Поради опасност од бегство, јавниот обвинител до судијата на претходна постапка од Основниот суд во Кавадарци поднел и предлог за определување мерка притвор за тројцата осомничени.
„На ова укажува и нивното однесување веднаш по настанот, бидејќи тие се оддалечиле од местото и не се пријавиле самите во полиција. Наместо тоа, отишле заедно во стан на едниот од осомничените. Од тие причини јавниот обвинител оцени дека притворот е неопходен за непречено водење на постапката и обезбедување на сите докази“
посочуваат од ОЈО Кавадарци.
Вчера МВР информира дека 43-годишен маж починал по тепачка пред казино во Кавадарци. Полицијата приведе три лица поради сомнеж дека се вмешани.