Со овие награди, кои се доделуваат по втор пат, од редакцијата на „Трн“ велат дека сакаат да испратат јасна порака дека општествените промени не започнуваат од големите декларации, туку од конкретни дела, локални иницијативи и луѓе кои одбиваат да молчат пред неправдата
Редакцијата на „Трн“ денеска ги додели симболичните признанија за иницијативи, колективи и поединци кои со својата работа, ангажман и храброст придонесуваат кон поинклузивно, поправедно и посолидарно општество
Со овие награди, кои се доделуваат по втор пат, од редакцијата на „Трн“ велат дека сакаат да испратат јасна порака дека општествените промени не започнуваат од големите декларации, туку од конкретни дела, локални иницијативи и луѓе кои одбиваат да молчат пред неправдата.
Во жири-комисијата, од „Трн“ велат дека бил редакцискиот тим што секојдневно ги следи, документира и анализира процесите што го обликуваат јавниот простор, граѓанскиот отпор и солидарноста во Македонија.
Признанијата се доделуваат во категории кои симболично ги опфаќаат клучните општествени борби и вредности – унапредување на правата на жените и родовата еднаквост, заштита на јавното здравје, младински иницијативи, интервенции во јавен простор и заштита на правата на Ромите.
Наградата „Женски Трн“ се доделува на борците за унапредување на женските права, а во оваа категорија годинава се доделени две признанија, како одраз на различни, но подеднакво значајни форми на активизам.
Едното признание е доделено на Сара Миленковска за нејзиниот доследен активизам во различни иницијативи за женски права и родова еднаквост, за јасниот јавен говор и за отворањето простор за теми кои често се премолчуваат, но длабоко ја засегаат реалноста на жените.
Второто признание „Женски Трн“ го доби Асоцијацијата за здравствена едукација и истражување ХЕРА за акцијата „Ни требаат 365 дена активизам, а не 16 дена симболика“ и за нивната континуирана, системска борба за женските права, телесната автономија и родовата правда.
„Сапорт Кочани“ ја добија наградата „Здрав Трн“ за нивните иницијативи за поддршка на повредените и семејствата на загинатите во трагедијата во Кочани, вклучувајќи го и отворањето на Младинскиот центар „Гнездо“, како и бројните акции за собирање донации и медицински препарати.
„Младински Трн“ е награда која беше доделена на Емир Хасановиќ за неговиот медиумски настап со постизборна анализа од младински агол, за пораките за генерацискиот јаз во Македонија и за отворањето прашања поврзани со потребите, политичката свест и улогата на младите во општеството.
Во категоријата „Трн на еднаквоста“ за заштита на правата на Ромите, беа доделени две признанија, како признание за институционалниот и личниот активизам.
Оваа награда беше доделена на „Јуроп хаус“ за аудиобајките „Сјајни ѕвезди – бајки раскажани од Ромите од Европа“ и на Ѓултен Мустафова (Ромалитико) за нејзиниот активизам за правата на жените Ромки и за континуираната борба за видливост, достоинство и еднаквост на Ромската заедница.
Наградата „Интервентен Трн“, како што велат од редакцијата е за гласовите кои во јавниот простор зборуваат храбро, директно и без компромис.
Наградата за интервенција во јавен простор беше доделена на колективот на народниот театар „Војдан Чернодрински“ – Прилеп, за говорот на церемонијата по повод доделување на наградите „3-ти Ноември“ и за јавното застапување за изградба на нова театарска зграда.
Награда во оваа категорија е доделена и на Иницијативата „Кој е следен?“, за нивните континуирани интервенции во јавниот простор, борбата за правда и отпорот против системската корупција.
Од редакцијата на „Трн“ велат дека признанијата не се финансиски, ниту институционални. Тие се, како што додаваат, симболичен гест на солидарност, благодарност и јавно признавање – порака дека некој гледа, слуша и препознава.