Додека Бабовски и другите околу него сакаат да ја замајат јавноста од детектираните присуства на резидуи од пестициди во храната од неживотинско потекло, добро е Бабовски да го посоветуваат околу наодите од тестирања и начинот на прикажување во нив, порача Трипуновски
Пестициди и тешки метали се детектирани во овошјето и зеленчукот кои се увезени во Македонија, а тоа недвосмислено го потврдуваат анализите кои ѝ ги презентирав на јавноста, реагира Цветан Трипуновски од ВМРО-ДПМНЕ откако директорот на Агенцијата за храна и ветеринарство (АХВ), Николче Бабовски, го обвини дека шири лажна паника во јавноста и најави можна кривична пријава.
„Додека Бабовски и останатите околу него сакаат да ја замајат јавноста од детектираните присуства на резидуи од пестициди во храната од неживотинско потекло, добро е Бабовски да го посоветуваат околу наодите од тестирања и начинот на прикажување во истите. Имено, од Правилникот за општите барања за безбедност на храната во однос на максималните нивоа на одделни контаминенти може да се види дека максималното ниво на контаминенти – метали е дадено само за олово и кадмиум изразено во мг/кг водена тежина). Зошто ДФЛ се повикува на максимално дозволено ниво на тешки метали и анекс на правилник кој не е на сила и истиот е објавен во Службен весник на РСМ бр. 227/2021? Не се детектира максимално дозволено ниво кај контаминенти, како што е тоа случај со резидуи од пестициди“,
посочува Трипуновски во објава на Фејсбук.
Дополнително, додава тој, лимитот на квантификација е изразен во ug/L, а добиениот резултат во ug/kg.
„Во мојата реакција беше наведена мерна единица. Но, што правиме со детектираното ниво на арсен во производите ? Дали и за тоа Трипуновски згреши ? Дали производите се безбедни согласно Закон и правилник, или за тие испитувања иако нема вредности не може да се обезбеди изјава за сообразност дали истите се сообразни? Зошто во наодот од тестирање на ФВМ има соодветна изјава на сообразност, а во оној на ДФЛ не? Дали државните инспектори знаат да ги протолкуваат овие резултати? Дали Агенцијата има изготвено анализа на ризик за максималното ниво на арсен во храната од неживотинско потекло врз човековото здравје“,
прашува Трипуновски.
Тој нагласи дека одговорност за овој, како што го нарече скандал, ќе има наскоро.
За најавата на Бабовски дека можно е АХВ да поднесе кривична пријава за ширење лажна паника во јавноста, Трипуновски рече дека тоа „само говори за вашиот очајнички обид да се извлечете од овој мега скандал, но нема да успеете“.
Директорот на АХВ денеска на прес-конференција, одговарајќи на новинарски прашања, истакна дека негативни се сите резултати за наводни резидуи од метали или присуство на тешки метали во овошјето и зеленчукот.
„Не знам која беше целта да се шири паника меѓу граѓаните. Изгледа при брифирањето некој некого излажал. Ако ги погледнете резултатите, некој помешал микро и милиграми. Сите се во рамки на дозволените количини. За жал, некој се декларира како демохристијан, а за време на верски празник излегува со неточни податоци – за мене е тоа нон-сенс. Ќе мора да преземеме некои активности за да се заштитат граѓаните. Нам не ни значи нечие извинување“,
рече Бабовски.
Ширењето лажна паника и тревога е кривично дело, додаде тој, а дали АХВ ќе поднесе пријава за тоа, ќе се знае наредните денови.