Два дена по породувањето, на 30 јуни, од ГАК велат дека пациентката се пожалила на вознемиреност и со неа бил извршен разговор со клинички психолог и била следена согласно дадените препораки, а на истата состојба се пожалила и во текот на вчерашниот ден при што дежурните лекари извршиле разговор со неа и била донесена одлука, за подобра проценка на состојбата пред испис да се повика психијатар
Триесет и деветгодишна жена е итно пренесена на Клиниката за анестезија, реанимација и интензивно лекување КАРИЛ, откако синоќа се обидела да се самоубие фрлајќи се од прозорец на Гинеколошко-акушерската клиника (ГАК).
Жената, како што информираат од ГАК од прозорецот се фрлила откако на Клиниката била породена со царски рез.
Во описот на случајот од ГАК се наведува дека пациентката е примена на 28 јуни во 21:16 часот заради крвавење во последниот триместар од бременоста и откако од страна на дежурен специјалист во амбулантата за итни случаи е утврдено дека се работи за предвремено одлепување на постелката, состојба којашто витално го загрозува плодот и сериозно го загрозува здравјето на мајката, е породена со царски рез.
Потоа, како што наведуваат од ГАК, пациентката веднаш била примена во родилна сала и по кусата предоперативна подготовка, и за 14 минути од приемот, е породена со царски рез во 21:30 часот, при што од ГАК велат дека е добиено живо машко дете во задоволителна кондиција. Пациентката потоа била уредно следена на одделот за породени жени – Пуерпериум, согласно медицинските стандарди и протоколи, велат од ГАК.
Два дена по породувањето, на 30 јуни, од ГАК велат дека пациентката се пожалила на вознемиреност и со неа бил извршен разговор со клинички психолог и била следена согласно дадените препораки. Следниот ден, како што се наведува во соопштението, пациентката била без особени тегоби и со уреден гинекошко-акушерски статус.
„На 2 јули на утринската визита се пожалила на слична симптоматологија како и на 30 јуни, при што дежурните лекари извршиле разговор со неа, ординирана е соодветна терапија и донесена е одлука, за подобра проценка на состојбата пред испис да се повика психијатар“,
се додава во соопштението од ГАК.
Во останатиот дел од денот, како што велат од ГАК, е продолжено со дневните активности и работни обврски на дежурната екипа, без дополнително влошување на состојбата на родилката.
„Ноќта околу 21:30 часот пациентката од болничката соба се упатила кон ходникот на одделот за Пуерпериум и преку прозорецот во ходникот направила обид за суицид, фрлајќи се од првиот кат“,
се наведува во соопштението од ГАК.
Оттаму додаваат дека за случајот биле известени надлежните институции.