Повредени се и неколкумина пожарникари, кои, како што информира синоќа директорот на ДЗС, Стојанче Ангелов, се здобиле со изгореници откако се заглавиле во смола од стопен шеќер во еден од погоните
„Вчеравечер околу 19:20 часот, претседателот на Стопанската комора, Бранко Азески, беше известeн од сопственикот на ‘Макпрогрес’ – Виница, Глигор Цветанов, дека во фабриката има пожар. Веднаш беше алармирана Владата, премиерот, како и вицепремиерот и министер за транспорт, кои ги дадоа потребните наредби за спасување на целокупната фабрика, но и покрај интензивните активности, мора да се констатира дека три клучни погони се целосно уништетни“, се вели во соопштението од Стопанската комора
Три уништени производствени погони, неколкумина повредени пожарникари и голема материјална штета е билансот од големиот пожар што вчера доцна попладне избувна во фабриката за кандирани производи и вафли „Макпрогрес“ во Виница, позната по брендот „Винчини“.
Огнената стихија, која беше пријавена вчера околу 18:40 часот, доцна синоќа беше ставена под целосна контрола, по неколкучасовната интервенција на локалните, но и на противпожарните екипи од повеќе општини од источниот дел на државата.
Неколкумина од пожарникарите, како што информира директорот на Дирекцијата за заштита и спасување (ДЗС), Стојанче Ангелов, се здобиле со изгореници на стапалата откако се заглавиле во смола од стопен шеќер во еден од погоните.
Имено, при обидот на пожарникарите да ги извлечат нозете, чизмите им останале во стопениот шеќер и згазнале во стопената смеса.
Засега не е познат точниот број на повредени пожарникари. Дел од медиумите објавија дека има и повредени цивили, но официјална потврда за ваквите наводи нема од надлежните институции.
„Радио Кочани“ синоќа објави фотографии од хоспитализирани лица со преврзани стапала и потколеници.
Според директорот на ДЗС, во фабриката се опожарени три производствени линии означени како 6,7 и 8, од кои два магацини. Сите имале сончеви панели на кровот, рече синоќа Ангелов.
Интервенцијата на пожарникарите спречила огнот да се прошири на производствените линии 1 и 5, кои, како што информира Ангелов, се спасени.
Во справувањето со пожарот учествуваа пожарникари од Територијалните противпожарни единици на Виница, Македонска Каменица, Делчево, Кочани, Пробиштип, Штип, Струмица, Кавадарци и Велес.
Од Стопанската комора утрово соопштија дека и таа вчера активно била вкучена во напорите за гаснење на пожарот во „Макпрогрес“, а била алармирана и Владата, пренесе МИА.
Од Комората изразија жалење за претрпената материјална штета и најавија формирање кризен штаб со сопственикот на фабриката, која е нивна членка, за целосно нормализирање на состојбите.
„Вчеравечер околу 19:20 часот, претседателот на Стопанската комора, Бранко Азески, беше известeн од сопственикот на ‘Макпрогрес’ – Виница, Глигор Цветанов, дека во фабриката има пожар. Веднаш беше алармирана Владата, премиерот, како и вицепремиерот и министер за транспорт, кои ги дадоа потребните наредби за спасување на целокупната фабрика, но и покрај интензивните активности, мора да се констатира дека три клучни погони се целосно уништетни“,
се наведува во соопштението од Стопанската комора.
Оттаму додаваат дека пожарот ќе остави длабока трага врз работењето на компанијата, која, како што наведуваат, е една од најуспешните извозни компании во Македонија, препознаена по брендот „Винчини“.
„Екипа на Стопанската комора е присутна на самото место од моментот на избувнување на пожарот и заедно со сопствениците ќе формира кризен штаб. Комората презема активности за целосно нормализирање на состојбите“,
се вели во соопштението од Стопанската комора.
Фабриката „Макпрогрес“ е основана пред 35 години, односно во 1990 година и е една од водечките производители во кондиторско-пекарската индустрија во земјава. Најголем дел, односно 75 проценти од нејзиното производство, е наменето за извоз, а производите се извезуваат во 45 држави.
Објави од загрижени граѓани има и на социјалните мрежи, кои велат дека пожарот е вистинска трагедија бидејќи станува збор за фабрика која вработува голем број жители на Виница.
Пожарот во фабриката, како што информира синоќа Центарот за управување со кризи, бил пријавен во 18:40 часот преку единствениот број за итни случаи – 112.
Стихијата, според ЦУК, избувнала во магацините и во производствените погони 6, 7 и 8 на фабриката, по што на терен веднаш излегле екипите на ТППЕ Виница со неколку противпожарни возила и пожарникари.
Ним на помош им дојдоа колеги од кочанската противпожарна единица и од Доброволното противпожарно друштво (ДПД) Кочани, а беа издадени насоки до градоначалникот на Виница да побара дополнителна поддршка и помош од соседните општини.