fbpx
Свет

Три руски воени авиони навлегле во воздушниот простор на Естонија, биле пресретнати од НАТО

360степени | 19 септември, 2025 20:37

„Русија веќе го прекрши естонскиот воздушен простор четири пати оваа година, што е неприфатливо само по себе, но денешното прекршување, за време на кое три борбени авиони влегоа во нашиот воздушен простор, е невидено дрско“, рече министерот за надворешни работи Маргус Цахкна

Илустративна фотографија

Три руски воени авиони „МиГ-31“ денеска го нарушиле воздушниот простор на Естонија и се задржале 12 минути, соопшти естонската влада.

Инцидентот, како што пишува Ројтерс, се случува нешто повеќе од една недела откако повеќе руски беспилотни летала влегоа во полскиот воздушен простор, поттикнувајќи авионите на НАТО да соборат некои од нив, а западните претставници да кажат дека Русија ја тестира подготвеноста и решителноста на алијансата.

Полска собори руски дронови кои летале во нејзиниот воздушен простор: Ова е чин на агресија

Министерството за надворешни работи на Естонија го осуди денешниот упад како „дрзок“.

„Русија веќе го прекрши естонскиот воздушен простор четири пати оваа година, што е неприфатливо само по себе, но денешното прекршување, за време на кое три борбени авиони влегоа во нашиот воздушен простор, е невидено дрско“,

рече министерот за надворешни работи Маргус Цахкна.

Портпаролката на НАТО, Алисон Харт, изјави дека воената алијанса „веднаш реагирала и ги пресретнала руските авиони“, нарекувајќи го „уште еден пример за неодговорно руско однесување и способноста на НАТО да одговори“.

Естонскиот премиер Кристен Михал подоцна изјави дека владата „одлучила да побара консултации по член 4 на НАТО“.

Естонската армија потврди дека руските борбени авиони биле пресретнати од италијански „Ф-35“ стационирани во Емари во Естонија, како дел од мисијата за воздушна полиција над Балтичкото Море.

Потврда за одговорот на НАТО има и од генералниот секретар Марк Руте. Тој по телефонски разговор со естонскиот премиер рече дека одговорот на НАТО беше „брз и решителен“.

Високата претставничка на ЕУ за надворешна и безбедносна политика, Каја Калас, вели дека Европската Унија е целосно солидарна со Естонија

„Денешното нарушување на естонскиот воздушен простор од страна на руски воени авиони е исклучително опасна провокација. ЕУ е целосно солидарна со Естонија“,

изјави Калас.

Таа додаде дека ЕУ ќе продолжи да ги поддржува земјите-членки во зајакнувањето на нивната одбрана со европски ресурси.

„Путин ја тестира решителноста на Западот, не смееме да покажеме слабост“,

рече Калас.

Претседателот на Европскиот совет, Антонио Кошта, изјави дека лидерите на ЕУ ќе разговараат за „колективен одговор на руските дејствија“ на претстојниот неформален состанок на Европскиот совет во Копенхаген на 1 октомври.

„Европската унија цврсто стои во солидарност со Естонија. Денешното нарушување на естонскиот воздушен простор од страна на три руски воени авиони е уште една неприфатлива провокација. Тоа уште еднаш ја нагласува итната потреба од зајакнување на нашето источно крило, продлабочување на европската одбранбена соработка и зголемување на притисокот врз Русија“,

напиша тој на социјалната мрежа Икс.

©2025 360 степени, Сите права се задржани