Директорот на Фондот за здравство Клековски информира и оти досега е утврдено дека на 18 повредени лица им е потребна пластична хирургија, но оти сè уште е рано за такви интервенции
Три повредени лица од пожарот во таканаречената дискотека „Пулс“, кој се случи на 16 март годинава, се на болничко лекување. Од нив, двајца се во Македонија и еден е во Истанбул, Турција, а нивната состојба е критична, но не е животнозагрозувачка, информира директорот на Фондот за здравство Сашо Клековски.
Тој вели дека уште двајца од повредените млади лица во пожарот се пуштени на домашно лекување, додека пак шест пациенти одат на лекување во болницата „Пирогов“ во Софија, како и во Скопје.
„Деновиве неколкумина се пуштени од Клиниката за пластична хирургија. Двајца од пациентите имаат отворени рани, но тие се лекуваат во кочанската болница“,
рече Клековски.
Тој рече и оти била направена процена од врвен хирург за пластична хирургија од Белгија на сите оние лица на кои им е потребна реконструктивна интервенција, и оти било утврдено дека на осумнаесет повредени ќе им биде потребна пластична хирургија, но оти сега е рано за такви интервенции.
„Ме радува фактот дека бројот на повредени се намали на тројца. Двајца пациенти се пуштени на домашно лекување, еден пациент се врати од Истанбул и еден од Одделот за пластична хирургија. Во болнички услови се лекуваат еден пациент во Истанбул и два повредени пациенти во државата. Тие се во тешка состојба, но не критична“,
кажа директорот на ФЗО.
Директорката на болницата во Кочани, Катерина Паниќ-Мирчовска, рече оти од преостанатите повредени, двајца пациенти одат на постојани третмани во болницата во градот, а Фондот за здравство поддржува контроли и за шест пациенти кои се вршат во Софија.
„Веќе сме на прагот на шесте месеци од трагичниот настан и ги следиме сите препораки на специјалистите. Силиконските маски за лице и врат за повредените се изработени со 3Д-печатење во Германија, се очекува во наредниот период да пристигнат кај повредените“,
кажа Паниќ-Мирчовска.