Белгиското обвинителство одбило да ги именува планираните цели, но неколку белгиски медиуми објавиле дека премиерот на земјата Барт де Вевер, кој претходно беше градоначалник на Антверпен, бил една од нив
Белгиските власти во четвртокот (9 октомври) соопштија дека уапсиле три лица кои се сомничат за планирање напад со беспилотно летало со експлозив, а премиерот на земјата Барт де Вевер бил меѓу неколкутемина политичари кои им биле цел, пренесуваат светските агенции.
Апсењата, како што изјавила белгиската обвинителката Ан Франсен на прес-конферфенција, биле извршени во северниот град Антверпен како дел од истрагата за „обид за терористичко убиство и учество во активности на терористичка група“.
„Одредени елементи укажуваат дека осомничените имале намера да извршат терористички напад врз политички личности, инспириран од џихадизмот. Исто така, постојат индиции дека осомничените имале намера да изградат беспилотно летало способно да носи товар“,
додала таа, пренесува АФП.
Обвинителството одбило да ги именува планираните цели, но неколку белгиски медиуми објавиле дека Де Вевер, кој беше градоначалник на Антверпен пред да стане премиер, бил една од нив.
Дека премиерот бил цел на планираниот терористички напад потврдил неговиот заменик, Максим Прево.
„Веста за планиран напад насочен кон премиерот Де Вевер е исклучително шокантна. Таа укажува дека се соочуваме со многу реална терористичка закана и дека мора да останеме будни“,
напиша Прево на социјалната платформа Икс, пренесува Ројтерс.
Според извештаите, полицијата извршила претрес во куќа која се наоѓа на само неколку стотини метри од домот на Де Вевер во градот.
„За време на претресот на куќата на еден осомничен, пронајдена е импровизирана направа, потенцијално експлозивна, но сè уште нефункционална, заедно со торба што содржела метални топчиња“,
изјавила обвинителката Франсен.
Во домот на вториот осомничен, полицијата пронашла 3Д печатач „за кој се верува дека бил наменет за производство на компоненти корисни за извршување на нападот“, додала таа.
Осомничените, како што се наведува се родени во 2001, 2002 и 2007 година.
Двајца од нив треба да се појават пред истражен судија во петок (10 октомври).