Туризмот е клучен извор на приход во Грција, а пожарите беснеат од почетокот на главната летна сезона на почетокот на јули
Трет топлотен бран ова лето ја погоди Грција. Грчките пожарникари денеска се бореа со пожари во близина на Атина и на други места, а некои села беа евакуирани.
Експлозии и огромни облаци од чад се слушнаа над селото Дросопигија, 25 км северно од Атина каде што се наоѓа фабрика за запаливи материјали. Хеликоптери го гаснеа огнот со вода, додека 65 пожарникари се бореа со пламенот со помош на 26 возила и два авиони.
Пожарот зафати две куќи, соопшти државната телевизија ЕРТ, додека на жителите на блиското село Крионерија им беше кажано да се упатат кон Атина.
Грчката метеоролошка служба соопшти дека температурите во Грција денеска ќе достигнат 44 Целзиусови степени.
На островот Евија, 115 пожарникари и 24 возила беа распоредени за гаснење на пожарот, а шест авиони и седум хеликоптери помагаа, но нивните напори беа попречени од силните ветрови. На некои жители на островот им беше кажано да бидат подготвени за евакуација.
Пожарот на Евија е најновиот во серијата шумски пожари овој месец кои беа поттикнати од силните ветрови и сувите временски услови.
На островот Китира, властите ги евакуираа селата Аронијадико, Пицинадес и Ариои. Во месинскиот регион, западно од Атина, на жителите на селата Крионерија и Селас им беше наредено да ја напуштат областа.
Местата беа на списокот на грчки области ставени во состојба на висока тревога поради рекордни температури и силни ветрови.
Туризмот е клучен извор на приход во Грција, а пожарите беснеат од почетокот на главната летна сезона на почетокот на јули.
Грција и другите медитерански земји се наоѓаат во она што научниците го нарекоа жариште на шумски пожари, каде што пожарите се чести за време на топлите, суви лета. Тие станаа подеструктивни во последниве години поради климата која брзо се менува, што предизвика повици за нов пристап.