Пратениците од власта сметаат дека ова е најтешкиот ребаланс затоа што се базира на најлошиот и најтешкиот Буџет досега. Тие сметаат дека има потреба не само од фискална консолидација, туку и од консолидација на државата. Според опозициските пратеници ова ќе биде најлошиот ребаланс
Комисијата за финансирање и буџет денеска трет ден по ред расправа за ребалансот на Буџетот.
Пратениците од власта сметаат дека ова е најтешкиот ребаланс затоа што се базира на најлошиот и најтешкиот Буџет досега. Тие сметаат дека има потреба не само од фискална консолидација, туку и од консолидација на државата.
Според пратениците на опозицијата, пак, овој ребаланс е најлошиот досега и со него нема раст на платите и пензиите, а зголемен е и јавниот долг од 58 на 68 отсто.
На вчерашниот втор ден, пратениците расправаа околу намалувањето на буџетот на судовите и јавните обвинителства. Пратениците од опозицијата велат оти институциите од судската власт треба да имаат поголеми буџети, а пратениците од парламентарното мнозинство сметаат дека овој буџет е дури и премногу за институциите со доверба од 2 % кај граѓаните.
Заменик-министерот за финансии, Николче Јанкуловски, вчера на собраниската комисиска расправа истакна дека Владата има намера да направи финансиска консолидација на целокупното стопанство, да ги екипира сите буџетски корисници и да направи контрола на непродуктивните трошења, притоа со зголемување на платите и пензиите.
Реплицирајќи ѝ на пратеничката Јованка Тренчевска од СДСМ, според која овој ребаланс е најлошиот досега, Јанкуловски потенцира дека Владата ги креирала проекциите согласно состојбите што ги наследила.
„Ова е најлошиот ребаланс, и за граѓаните и за еконоимијата. Платите и пензиите во изминатите години растеа како никогаш досега, како и просечната и минималната плата, а како резултат на тоа се подобруваше животот на граѓаните и тоа е непобитен факт, но и доказ за добрите политики на СДСМ. Во делот на пензиите, ако вие како ВМРО-ДПМНЕ ги зголемувавте 11 години како ние, наместо да ги лажете пензионерите со 600 денари, денеска ќе зборувавме за минимални пензии од 20 000 денари“, рече Тренчевска.
Општата расправа за ребалансот на Буџетот трае најмногу три дена, а амандманската за која се поднесени 58 амадмани, шест дена.
На првиот ден од расправата, министерката Гордана Димитриеска-Кочоска го образложи ребалансот, нагласувајќи дека е креиран согласно затекнатите состојби во Буџетот.
Вкупните приходи во ребалансот на Буџетот се планирани на 318,2 милијарди денари, а расходите на 362,8 милијарди денари. Растот на БДП е проектиран на 2,1 процент, инфлацијата на ниво од 3,5 проценти, а буџетскиот дефицит на 4,9 проценти.