Со оваа одлука, велат од СДСМ, се оштетени над 318 000 пензионери кои ќе добијат помали пензии отколку што реално им следува
Пратеничката на СДСМ и поранешна министерка за труд и социјална политика Јована Тренчевска и денеска обвинува дека последната одлука на Владата за линеарно зголемување на пензиите за 1 000 денари претставува историска измама, со која се укинува законскиот механизам за усогласување на пензиите со трошоците за живот.
Според неа, со оваа одлука пензионерите ќе бидат оштетени двапати – најпрво во септември 2025 година, а потоа повторно во март 2026 година.
„Механизмот што го донесе СДСМ да ги штити пензиите од инфлација и раст на трошоците за живот ќе значеше зголемување на сите пензии за 5 отсто во септември и уште 5 отсто во март, со сегашното ниво на трошоци и плати“,
вели Тренчевска.
Од опозициската партија се тврди дека 92,5 отсто од сите пензионери, односно над 318 000 лица, ќе добијат помалку од тоа што им следува. Според нив, дел од пензионерите ќе бидат оштетени и за 2 000 до 4 000 денари месечно.
„Само 7,5 отсто ќе добијат некаква корист, и тоа – помалку од тоа што им следува и го заслужиле. Ова не е повисока пензија, ова е системска измама и пресметан грабеж. Ете толку им краде владата на пензионерите во септември и март“,
соопшти Тренчевска.
Партијата укажува и на инфлацијата, која според нив достигнува 4,5 отсто, а животните трошоци пораснале за над 6 000 денари годишно. Дополнително, дефицитот на ПИОМ надминува 47 отсто, што според неа е сериозна закана за идната исплата на пензиите.
„Луѓето кои ги изградиле училиштата, болниците, патиштата, фабриките – денес живеат со скратена пензија и чувство дека се заборавени. Не бараат милостина – бараат правда и достоинство“,
кажа Тренчевска.