Министерката за труд и социјална политика Јованка Тренчевска потпиша договори за соработка и групна набавка со општините Карбинци, Дебар и Македонски Брод, со кои се предвидува министерството да обезбеди финансии за доградба или реконструкција на дел од постоечките објекти во градинките во овие три општини.
„Соработката со општините е клучна, инвестираме во проекти од кои директна придобивка имаат нашите граѓани“
порача министерката Тренчевска.
Договорот потпишан со градоначалникот на Македонски Брод, Жарко Ристески се однесува на изведување на градежни работи за реконструкција со пренамена на детска градинка во Центар за дневен престој за деца со пречки во развој за 24 корисници поделени во две групи по 12 корисници, а предвидените активности се согласно програмата на Владата за изградба, опремување и одржување на објекти за социјална заштита и домови за стари лица за 2023 година, соопшти Министерството за труд и социјална политика.
Од МТСП информираат и дека договорот потпишан со градоначалникот на Карбинци, Виктор Паунов, се однесува на реализација и финансирање на активности за изведување на градежни работи за доградба на постоечка детска градинка во Oпштина Карбинци село Таринци, со капацитет од 48 деца. Предвидените активности се согласно програмата на Владата на Република Северна Македонија за изградба, опремување и одржување на објекти за детска заштита за 2022 година, како и согласно програма за изградба, опремување и одржување на објекти за детска заштита за 2023 година.
Во општина Дебар се доградува градинката Брешиа, а договорот потпишан меѓу Тренчевска и градоначалникот Хекуран Дука е за измени во текот на доградбата на објектот со капацитет за 62 деца. Предвидените активности се согласно програмата на Владата на Република Северна Македонија за изградба, опремување и одржување на објекти за детска заштита за 2021 година.