„Со имплементацијата на е-фактурата, драматично се намалува ризикот од појава на фантом-фирми кои исцрпуваа стотици милиони евра од буџетот преку лажен поврат на ДДВ. Ако се применува правилно, како што верувам дека ќе биде, ваквите злоупотреби ќе станат практично невозможни“, вели премиерот, кој денеска ја посети УЈП
Управата за јавни приходи (УЈП) ја претстави националната платформа за електронско фактурирање е-фактура, која најавува трансформација на даночниот систем на државата.
Со овој систем, секоја безготовинска трансакција ќе биде евидентирана и контролирана во реално време, со цел зголемување на транспарентноста, дисциплината и довербата во фискалниот систем.
Е-фактурата е двоен документ, комерцијален и автоматизиран даночен запис со кој се заменува постоечкиот модел на месечна или тримесечна пријава на податоци кон УЈП.
Новиот систем овозможува информациите од секоја фактура да пристигнуваат моментално, по нејзиното издавање.
Директорката на УЈП, Елена Петрова, нагласи дека овој проект е повеќе од техничка новина.
„Во разумен рок ќе го објавиме стандардот и спецификацијата на задолжителните елементи на е-фактурата, со цел деловниот сектор да може навремено да се подготви“,
рече таа.
Според неа, овој систем значи административно и финансиско олеснување за компаниите, со кој ќе нема повеќе печатење, испраќање или чување хартиени фактури.
„Особено за сопствениците на бизниси, ова ќе овозможи поголема контрола, сигурност и одговорност бидејќи секоја фактура ќе биде дигитално потпишана и ќе има електронска трага“,
кажа Петрова.
Министерката за економија Гордана Димитриеска-Кочоска потенцира дека овој систем е од огромно значење за борбата против сивата економија.
„Со оглед на тоа што ДДВ е еден од најзначајните буџетски приходи, преку е-фактурата ќе имаме подобар увид кој, кога и како фактурира, а со тоа е помала можноста за злоупотреби. Овој систем е алатка за спречување на појавите кои ги констатиравме во минатото“,
вели министерката.
Премиерот Христијан Мицкоски, кој денеска ја посети УЈП, го нагласи значењето на овој систем во борбата против финансискиот криминал.
„Со имплементацијата на е-фактурата, драматично се намалува ризикот од појава на фантом-фирми кои исцрпуваа стотици милиони евра од буџетот преку лажен поврат на ДДВ. Ако се применува правилно, како што верувам дека ќе биде, ваквите злоупотреби ќе станат практично невозможни“,
рече тој.
Процесот на имплементација на е-фактура е организиран етапно и веќе од 1 јануари 2026 започнува пилот-фазата со претставници од деловниот сектор.
Задолжителната примена се очекува во третиот квартал од 2026 година.