Трамп: Воздушниот простор над и околу Венецуела да се смета за целосно затворен

До сите авиокомпании, пилоти, трговци со дрога и луѓе, ве молиме, сметајте го воздушниот простор над и околу Венецуела за целосно затворен, објави Трамп

Воздушниот простор над и околу Венецуела треба да се смета за целосно затворен, соопшти американскиот претседател Доналд Трамп, без да открие повеќе детали.

„До сите авиокомпании, пилоти, трговци со дрога и луѓе, ве молиме, сметајте го воздушниот простор над и околу Венецуела за целосно затворен“,

напиша Трамп на социјалната мрежа Трут соушл.

Објавата на Трамп следува во услови на растечки конфликт со претседателот на Венецуела, Николас Мадуро.

Според американската администрација, режимот на Мадуро ја претворил Венецуела во наркодржава и влегол во партнерство со колумбиската герила за извоз на дрога во Европа и САД преку организација позната како „Картел на сонцата“. 

Рубио: „Картелот на сонцата“ е предводен од Николас Мадуро и е одговорен за трговија со дрога во САД и во Европа

Федералната администрација за воздухопловство на САД минатата недела ги предупреди главните авиокомпании во земјата за „потенцијално опасна ситуација“ при летање над Венецуела поради „влошувањето на безбедносната состојба и зголемената воена активност во или околу земјата“.

Веќе неколку недели американските сили напаѓаат глисери во близина на брегот на Венецуела, за кои се сомневаат дека шверцуваат дрога во САД. Каракас го осуди значителното американско воено присуство во областа како заканувачки гест. Нападите, исто така, предизвикаа меѓународни критики и ги поттикнаа Обединетите нации да ги повикаат САД на воздржаност.