Држејќи голема табела со наслов „реципрочни тарифи“, на која се прикажани царините што другите земји ги наметнуваат на САД во споредба со американските царини за нив, Трамп рече дека никој не треба да биде лут на тоа
Северна Македонија се најде на листата на американскиот претседател Доналд Трамп на која и се воведуваат царини.
Стапките на царини што ги воведува Трамп се движат од 10 до 50 отсто, а за Северна Македонија, според она што го објави се 33 отсто, односно половина од она што, според табелите, земјата го има како царина кон САД, а тоа е 65 отсто.
Од регионот, според табелите што се објавуваат, со повисоки царини се Босна и Херцеговина со 35 и Србија со 37 отсто. Царините што се воведуваат за Косово, Албанија и за Црна Гора се 10 отсто.
Највисоки царини на светско ниво се воведуваат за Камбоџа и тие ќе изнесуваат 49 отсто.
Држејќи голема табела со наслов „реципрочни тарифи“, на која се прикажани царините што другите земји ги наметнуваат на САД во споредба со американските царини за нив, Трамп рече дека никој не треба да биде лут на тоа.
„Тие ни наплаќаат на нас, ние на нив. Кој може да биде лут поради тоа?“,
рече Трамп.
Тој особено ги издвои Кина и Европската Унија, велејќи дека Кина со години ги искористува САД преку нефер трговски практики и оти „сега ќе се заштитиме“.
Во табелите што ги објави Трамп може да се види дека мерките што ги воведува за Кина се 34 отсто, а за Европската Унија тие се 20 отсто.
Трамп во денешното обраќање на „денот на ослободувањето“ како што го нарече, рече дека овој ден засекогаш ќе биде запаметен како ден кога американската индустрија се преродила.
„Денес имаме многу, многу добри вести. Многу добри работи се случуваат за нашата земја“,
рече Трамп.
Тој прогласи „национална вонредна состојба“ поради трговскиот дефицит, за кој Белата куќа вели дека претставува закана за економската безбедност на САД.
„На пример, повеќе од 80 отсто од автомобилите произведени во Јужна Кореја се продаваат во Јужна Кореја, а повеќе од 90 отсто од автомобилите што се продаваат во Јапонија се произведени во Јапонија“,
рече тој.
Тој додаде дека автомобилите произведени во САД, како што е „форд“, имаат само симболично присуство на овие пазари, што, според неговите зборови, „ја опустоши американската автомобилска индустрија“.
„Затоа, почнувајќи од полноќ, ќе стапи на сила царината од 25 отсто за сите возила произведени во странство“,
најави Трамп.
Во обраќањето тој додаде дека тарифите нема да бидат целосно реципрочни велејќи оти другите земји „лошо се однесуваат кон САД“ со години, наметнувајќи несразмерно високи царини за американскиот извоз, што тој го спореди со „измама“.
Затоа, вели тој, САД ќе наплаќаат околу половина од она што другите земји им го наплатуваат на Американците.
„Значи, тарифите нема да бидат целосно реципрочни. Можев да го сторам тоа, да, но тоа би било тешко за многу земји“,
рече Трамп.
Тој додаде и дека компаниите што произведуваат во САД нема да плаќаат никакви царини.
„Нема тарифа ако го правите вашиот производ овде, во Америка“,
рече претседателот.
Тој исто така најави дека наскоро ќе почне да добива покани од „кралевите, кралиците и амбасадорите“ кои бараат ослободување од царините.
Според него, со ова работните места ќе се вратат во САД и ќе се отворат странските пазари за американските производи.
Тој најави посилна пазарна конкуренција и пониски цени за потрошувачите, што предизвика аплауз од толпата.
Според Трамп, САД повеќе не можат да си дозволат трговски дефицит со другите земји бидејќи, како што тврди, ги субвенционирале предолго.
„Ние се грижиме за земјите ширум светот. Време е да почнеме да се грижиме за сопствениот народ“,
рече тој.