„Оваа нафта ќе се продава по нејзината пазарна цена, а парите ќе бидат контролирани од мене, како претседател на Соединетите Американски Држави, за да се осигуриме дека тие ќе бидат употребени за доброто на венецуелскиот народ и на САД“, објави американскиот претседател на неговата социјална платформа Трут соушл (Truth Social)
Венецуела и Соединетите Американски Држави (САД) постигнаа договор за извоз на венецуелска сурова нафта во вредност од две милијарди долари во САД, објави вчера американскиот претседател Доналд Трамп.
Договорот доаѓа само неколку дена откако Соединетите Држави изведоа акција во Венецуела во која од власт беше соборен, условно кажано, доскорешниот претседател на земјата, Николас Мадуро, и спроведен во Њујорк, каде што беше изведен пред суд.
Според објавата на Трамп, САД со договорот со Каракас, директно интервенира во нафтената индустрија на Венецуела и ја обездува контролата врз приходите од продажбата на нафта.
Венецуела, како што најави американскиот претседател, на САД ќе им испорача помеѓу 30 и 50 милиони барели (еден барел има 159 литри) нафта која е под санкции, а тој самиот ќе ги контролира приходите од нејзината продажба.
Сепак, она што е нејасно, а не го наведува и самиот Трамп, е во кој временски период Каракас треба да го обезбеди ова количество на сурова нафта, кое, според обемот, приближно одговара на вкупното производство на венецуелската нафтена индустрија за еден до два месеци, пишува „Дојче веле“.
Инаку, според Трамп, нафтата ќе се продава по пазарна цена, а спроведувањето на договорот ќе го води американскиот секретар за енергетика Крис Рајт. Нафтата, според најавите ќе биде насочена од танкерите во кои е складирана, директно до американските пристаништа.
„Оваа нафта ќе се продава по нејзината пазарна цена, а парите ќе бидат контролирани од мене, како претседател на Соединетите Американски Држави, за да се осигуриме дека тие ќе бидат употребени за доброто на венецуелскиот народ и на САД“,
напиша Трамп во објавата на неговата социјална платформа Трут соушл (Truth Social).
Поради ембаргото за извоз што беше воведено кон средината на декември, Венецуела има милиони барели нафта складирани на танкери и во резервоари што земјата не можеше да ги испорача. Дел од пратките што сега треба да завршат во САД првично беа наменети за Кина, најголемиот купувач на венецуелска нафта во последните години.
Цените на суровата нафта во САД паднаа за повеќе од 1,5 проценти по објавувањето на договорот меѓу Каракас и Вашингтон, а причината, како што наведуваат дел од медиумите, лежи во очекувањата од зголемување на количината на венецуелска нафта на американскиот пазар.
Инаку, извозот на венецуелска нафта во САД во моментов е целосно контролиран од „Шеврон“, единствената американската компанија со лиценца за извоз, која испорачува помеѓу 100 000 и 150 000 барели нафта дневно.
Непознато останува и дали Венецуела ќе има пристап до приходите од продажбата, бидејќи сметките на државната компанија ПДВСА (PDVSA) се замрзнати поради санкциите на САД.
Секретарот за внатрешни работи на САД, Даг Баум, изјави дека зголемениот проток на тешка венецуелска нафта во рафинериите на брегот на Мексиканскиот Залив би бил корисен за американскиот пазар на гориво и за венецуелската економија. Пред воведувањето на санкциите, американските компании во областа увезуваа околу 500 000 барали венецуелска нафта дневно.
Губењето на приходите од продажбата на нафта би било многу болно за Венецуела. Од друга страна, за САД очекуваните приходи би претставувале релативно мала сума бидејќи, според владинините информации, Венецуела произвдува речиси 14 милиони барели нафта дневно.
Според очекувањата на Трамп, американските компании сега треба масовно да инвестираат и да ја обноват распадната нафтена индустрија во Венецуела. Во меѓувреме, американскиот претседател се најде под остри критики од голем број демократи во САД, кои го обвинуваат дека ја нападнал Венецуела само поради нејзините нафтени резерви, кои се сметаат за најголеми во светот. Според демократите, апсењето на Мадуро поради наводна трговија со дрога и финансирање тероризам било само изговор.