Ова е негово прво јавно појавување откако адвокатите во негово име побараа отштета од 1 милијарда долари, повлекување на документарецот и извинување, објави британската телевизиска мрежа
Американскиот претседател Доналд Трамп изјави дека има „обврска“ да ја тужи британската телевизиска мрежа Би-би-си поради начинот на кој дел од неговиот говор бил монтиран во документарецот „Панорама“.
Во разговор за „Фокс њуз“, тој рече дека неговиот говор од 6 јануари 2021 година бил „искасапен“ и дека начинот на кој бил презентиран ги „измамил“ гледачите.
Ова е негово прво јавно појавување откако адвокатите во негово име побараа отштета од 1 милијарда долари, повлекување на документарецот и извинување, објави Би-би-си.
Претседателот на Би-би-си, Самир Шах, претходно се извини за „грешка во проценката“ во врска со монтирањето.
Појавувајќи се во емисијата „Инграм англ“ на Фокс њуз, претседателот беше прашан дали ќе продолжи со тужбата, одговарајќи „па, претпоставувам дека морам, знаете, зошто да не, бидејќи ја измамија јавноста и го признаа тоа“.
„Всушност, тие го променија мојот говор од 6 јануари, кој беше прекрасен говор, кој беше многу смирувачки говор, и го направија да звучи радикално. И всушност го променија. Она што го направија беше прилично неверојатно“,
вели тој.
На повторно прашање дали ќе продолжи со правната постапка, тој рече дека според негово мислење има обврска да го стори тоа, „бидејќи не можете да ги натерате луѓето, не можете да им дозволите на луѓето да го прават тоа“.
За потсетување, адвокатите на Трамп испратија писмо до Би-би-си во неделата, барајќи „целосно и фер повлекување“ на документарецот, извинување и „соодветна компензација“. На корпорацијата ѝ беше даден рок до 22 часот по британско време во петок да одговори. Би-би-си соопшти дека ќе одговори навреме.
Аферата, која минатата недела ја откри британскиот весник „Дејли телеграф“ (The Daily Telegraph), се однесува на документарен филм емитуван една недела пред претседателските избори во САД на 5 ноември 2024 година.
Би-би-си беше обвинет дека монтирал делови од говорот на Доналд Трамп одржан на 6 јануари 2021 година, на таков начин што изгледало како да им кажува на своите приврзаници дека ќе маршира со нив до Капитол за да „се борат како ѓаволи“.
Генералниот директор на Би-би-си, Тим Дејви, и извршната директорка на вестите Дебора Тернес, поднесоа оставки по критиките дека документарецот на Би-би-си, „Панорама“, ги довел во заблуда гледачите со монтажа на говор на американскиот претседател Доналд Трамп.