„Ако НАТО го стори тоа што го велам, војната ќе заврши брзо и сите тие животи ќе бидат спасени! Ако не, само ги трошите моето време, енергијата и парите на Соединетите Американски Држави“, вели Трамп
Американскиот претседател Доналд Трамп изјави дека е подготвен да ѝ воведе санкции на Москва, но под услов сите сојузници на НАТО да се согласат целосно да го запрат купувањето руска нафта и да ги спроведат своите санкции.
Тој, исто така, им предложи на членовите на трансатлантската алијанса да размислат за воведување царини од 50 до 100 отсто врз Кина за нејзините купувања руска нафта како начин да се помогне во завршувањето на војната.
„Подготвен сум да воведам големи санкции врз Русија кога сите земји-членки на НАТО ќе се согласат и ќе почнат да го прават истото, и кога сите земји членки на НАТО ќе престанат да купуваат нафта од Русија“,
напиша Трамп во писмо испратено до сите земји членки на НАТО, а кое го објави на неговата страница Трут Соушал.
Трамп рече дека посветеноста на Алијансата за победа во војната е многу помала од 100 отсто и го нарече купувањето руска нафта од страна на некои членови на НАТО шокантно.
„Ако НАТО го стори тоа што го велам, војната ќе заврши брзо и сите тие животи ќе бидат спасени! Ако не, само ги трошите моето време и времето, енергијата и парите на Соединетите Американски Држави“,
додава тој.
Трамп постојано ѝ се заканува на Русија со дополнителни санкции, но досега не успеа да ги исполни.
Тој, исто така, ја претстави можноста НАТО да ѝ воведе царини на Кина, која ги продлабочи врските со Москва, по средбата меѓу Си Ѓинпинг и Владимир Путин неодамна во Пекинг.
„Верувам дека санкциите на НАТО врз Русија, плус НАТО, како група, кои воведуваат царини од 50 до 100 отсто врз Кина, кои треба целосно да се повлечат по завршувањето на војната со Русија и Украина, исто така ќе бидат од голема помош во завршувањето на оваа смртоносна, но смешна војна“,
рече Трамп.
Кина, вели Трамп, има силна контрола врз Русија, а овие моќни тарифи ќе го скршат тоа.
„Ова не е војната на Трамп (никогаш немаше да започне ако бев претседател), тоа е војната на Бајден и Зеленски. Јас сум тука само за да помогнам да се спречи и да се спасат илјадници руски и украински животи“,
додава тој.
Претседателот на САД веќе воведе данок од 25 проценти за увоз на стоки од Индија поради купувањето руски енергетски производи, но сè уште не воведе дополнителни царини врз Кина за истото.
Објавата на Трамп дојде во време на зголемени тензии откако повеќе руски беспилотни летала навлегоа во Полска во средата, влегувајќи во воздушниот простор на НАТО и означувајќи потенцијална ескалација на војната, поттикнувајќи ја алијансата да објави нова мисија за зајакнување на своето источно крило.