Заканата на Трамп доаѓа по месеци лобирање на американските конзервативци кои тврдат дека христијаните во Нигерија се соочуваат со геноцид, објави агенцијата Франс прес
Американскиот претседател Доналд Трамп вчера објави дека му наредил на Министерството за одбрана на САД да почне подготовки за можна воена операција во Нигерија доколку владата на земјата не спречи прогон и убиства на христијани, пренесуваат светските медиуми.
Трамп ова го соопшти во објава на социјалната платформа Трут соушл (Truth Social), во која додава дека американската влада веднаш ќе ја прекине целата помош за оваа африканска земја доколку не преземе нешто за прогонот на христијаните.
„Ако нападнеме, тоа ќе биде брзо, сурово и слатко, исто како што терористичките насилници ги напаѓаат нашите САКАНИ христијани! ПРЕДУПРЕДУВАЊЕ: НИГЕРИСКАТА ВЛАДА ПОДОБРО ДА ДЕЈСТВУВА БРЗО!“
напиша Трамп осврнувајќи се на исламските фундаменталисти во најнаселената земја во Африка.
Еден ден претходно Трамп ја вклучи Нигерија на списокот земји за кои САД изразуваат длабока загриженост кога станува збор за верската слобода, наведувајќи дека христијанството таму се соочува со егзистенцијална закана.
Наводите на Трамп дека Нигерија е нетолерантна кон верските различности ги отфрли претседателот на земјата Бола Тинубу, кој е муслиман во брак со христијанска пасторка.
„Карактеризирањето на Нигерија како религиозно нетолерантна земја не ја одразува нашата национална реалност“,
напиша Тинубу на платформата Икс.
Инаку, одлуката на Трамп доаѓа по месеци лобирање на американските конзервативци кои тврдат дека христијаните во Нигерија се соочуваат со геноцид, објави агенцијата Франс прес.
Француската агенција пишува дека Нигерија, земја речиси подеднакво поделена на исламски север и христијански југ, е преплавена од конфликти во кои подеднакво страдаат припадниците на обете религии.
Североисточниот дел од земјата повеќе од 15 години се соочува со џихадистичко насилство од страна на групата „Боко Харам“, што досега одзеде 40 000 животи и принуди два милиони луѓе да избегаат.
Во централниот дел на земјата, пак, судирите меѓу муслиманските сточари и претежно христијанските земјоделци се чести, но експертите истакнуваат дека овие конфликти најчесто се водат за земјата, додава агенцијата Франс прес.