fbpx
Свет

Трамп се ракуваше со лидерот на Сирија, поранешен џихадист: Млад, привлечен човек

360степени | 14 мај, 2025 16:15

Ахмед ал Шара, познат и по неговиот воен прекар Абу Мохамад ал Џулани, беше истакнат член и командант на Ал Каеда во Ирак, каде што учествуваше во вооружени акции против американските сили и беше уапсен и затворен во неколку американски и ирачки логори

Американскиот претседател Доналд Трамп го пофали привремениот претседател на Сирија, Ахмeд ал Шарa, откако денеска одржаа клучен состанок во Ријад.

Според Си-ен-ен, американскиот претседател им рекол на новинарите дека неговите разговори со Шара поминале добро, додавајќи дека тој е одличен и млад, привлечен и цврст човек со многу силно минато.

Трамп рекол дека Шара има вистинска можност да ја одржи Сирија обединета.

Тој, исто така, нагласил дека земјата на крајот ќе пристапи кон Абрахамовите спогодби, што била една од главните теми на состанокот. Трамп рекол дека Шара одговорил потврдно кога бил прашан за евентуално приклучување кон пактот.

„Мислам дека прво мора да се смират“,

додал Трамп.

Според соопштението на Белата куќа, за време на состанокот, Трамп изнел низа упатства до Шара, вклучувајќи го потпишувањето на Абрахамовиот договор за нормализирање на односите со Израел, наредба сите странски терористи да ја напуштат Сирија, депортирање на палестинските терористи, помагање на САД да го спречат повторното појавување на ИСИС и преземање одговорност за центрите за притвор на борците на ИСИС во североисточна Сирија.

Саудискиот престолонаследник и турски претседател

На Шара и Трамп им се придружиле саудискиот престолонаследник Мохамед бин Салман, кој учествувал лично, и турскиот претседател Реџеп Таип Ердоган, кој се придружил преку телефон. Трамп вчера изјави дека и престолонаследникот и Ердоган одиграле клучна улога во неговата одлука за укинување на санкциите против Сирија.

Трамп ги укинува сите санкции против Сирија

„Во секој случај, нема да биде лесно. Значи, ова им дава добра, силна можност и ми беше чест да го направам тоа“,

рече тој.

Во соопштението се вели дека лидерите разговарале и за конфликтот меѓу Израел и Хамас и војната во Украина.

Терористичкото минато на Шара

Ахмед ал Шара, познат и по неговиот воен прекар Абу Мохамад ал Џулани, беше истакнат член и командант на Ал Каеда во Ирак, каде што учествуваше во вооружени акции против американските сили и беше уапсен и затворен во неколку американски и ирачки логори, вклучувајќи ги Камп Бука и Камп Таџи.

На почетокот на 2010-тите, по наредба на највисокото раководство на Ал Каеда, тој основал огранок во Сирија, Џабхат ал Нусра (Фронт на победата), кој набрзо станал една од најмоќните и најрадикални фракции во сириската војна, директно поврзана со Ал-Каеда.

Под негово водство, Џабхат ал Нусра, а подоцна и Хајат Тахрир ал Шам (ХТС), вршеа терористички и криминални активности како што се киднапирања, изнуда и напади врз цивили, што ги натера ОН, САД, ЕУ и други меѓународни тела да ги прогласат овие организации за терористички.

Иако формално ги прекина врските со Ал Каеда во 2016 година и се обиде да го преобликува имиџот на ХТС, меѓународните организации сè уште го сметаат за одговорен за бројни злосторства и терористичко минато.

©2025 360 степени, Сите права се задржани