Трамп рече дека многу продуктивниот состанок со Руте воспоставил рамка за иден договор во врска со Гренланд и, всушност, целиот арктички регион. Тој оцени дека решението, доколку се реализира, би било одлично за Соединетите Американски Држави и сите земји членки на НАТО
Американскиот претседател Доналд Трамп објави дека е формирана рамка за иден договор за Гренланд и арктичкиот регион по состанокот со генералниот секретар на НАТО, Марк Руте. Според тоа, тој најави одложување на воведувањето на царините што требаше да стапат во сила на 1 февруари, напиша тој на социјалната мрежа Трут сошал.
Трамп рече дека многу продуктивниот состанок со Руте воспоставил рамка за иден договор во врска со Гренланд и, всушност, целиот арктички регион. Тој оцени дека решението, доколку се реализира, би било одлично за Соединетите Американски Држави и сите земји членки на НАТО.
Врз основа на постигнатото разбирање, Трамп потврди дека се откажува од воведување царини.
„Нема да воведувам царини што требаше да стапат во сила на 1 февруари“,
се вели во соопштението.
Тој додаде дека се водат дополнителни дискусии во врска со „Златната купола“ во Гренланд и дека повеќе информации ќе бидат достапни како што напредуваат разговорите.
Трамп рече дека потпретседателот Џеј-Ди Венс, државниот секретар Марко Рубио и специјалниот пратеник Стив Виткоф ќе бидат задолжени за преговорите. Тој нагласи дека тие ќе поднесат извештај директно до него.
Трамп за време на викендот најави дека од 1 февруари ќе воведе царини за осум европски држави, кои ќе бидат во сила додека не биде склучен договор за целосна и комплетна продажба на Гренланд. Трамп најави и дека царините би можеле да се зголемат и до 25 проценти од 1 јуни. Данска, Финска, Франција, Германија, Холандија, Норвешка, Шведска и Велика Британија преку заедничка изјава наведоа дека таквите чекори ги поткопуваат трансатлантските односи.