„Не знам дали тоа ќе влијае на Русија бидејќи, очигледно, тие сакаат да ја продолжат војната, но ние ќе воведеме царини и слични работи што може и не мора да влијаат врз нив“, изјави претседателот на САД
Американскиот претседател Доналд Трамп изјави дека Русија има 10 дена од денеска да ја заврши војната со Украина, а во спротивно ќе се соочи со санкции од Соединетите Американски Држави.
„Не знам дали тоа ќе влијае на Русија бидејќи, очигледно, тие сакаат да ја продолжат војната, но ние ќе воведеме царини и слични работи што може и не мора да влијаат врз нив“,
изјави Трамп пред новинарите.
На прашањето за точниот временски рок кој му го дава на рускиот претседател Владимир Путин, тој рече:
„Десет дена од денеска“.
Трамп во понеделникот изјави дека ќе го скрати рокот за прекин на огнот во Украина што му го даде на рускиот претседател од првично најавените 50 дена на 10 до 12 дена. Најавата дека поставениот десетдневен рок почнува да тече од денеска значи дека тој очекува Кремљ да преземе одредени мерки до 8 август.
Трамп додаде дека не слушнал одговор од Русија иако претходно денеска портпаролот на Кремљ, Дмитриј Песков, изјави дека ја забележале изјавата на претседателот на САД и дека специјалната воена операција продолжува. Додаде дека Русија останува посветена на мировен процес за решавање на конфликтот околу Украина, но и за обезбедување на своите интереси во текот на процесот.