Трамп пред неколку дена на неговата социјална мрежа Трут соушл напиша дека Путин можеби „го влече за нос“ кога станува збор за преговорите. Трамп го даде коментарот кратко по средбата со украинскиот претседател Володимир Зеленски во Ватикан на 26 април
Актуелниот американски претседател Доналд Трамп зборуваше за војната во Украина за време на интервјуто за Еј-би-си њуз кое се емитуваше синоќа.
Во интервјуто, кое се фокусираше на првите 100 дена од новиот мандат на Трамп, новинарот го праша за неговите спротивставени ставови за мировните преговори.
Трамп пред неколку дена на неговата социјална мрежа Трут соушл напиша дека Путин можеби „го влече за нос“ кога станува збор за преговорите. Трамп го даде коментарот кратко по средбата со украинскиот претседател Володимир Зеленски во Ватикан на 26 април.
„Нема причина Путин во последниве денови да испукува ракети врз цивилни области, градови и села. Затоа мислам дека можеби воопшто не сака да ја заврши војната, туку само ме влече за нос и можеби треба да се изврши притисок врз него на поинаков начин, со банкарски или секундарни санкции?“,
напиша Трамп тогаш.
На прашањето од Еј-би-си њуз дали мисли дека Путин ги одолговлекува преговорите, Трамп одговори:
„Можно е. Но би рекол дека тој сепак би сакал да ја запре војната“.
И покрај сомнежите, подоцна во интервјуто рече:
„Мислам дека сака мир, да. Мислам дека навистина го сака.“
Трамп, кој претходно вети дека ќе договори мир во Украина во рок од 100 дена од враќањето на власт, станува сè повеќе фрустриран од она што го нарекува неподготвеност на Москва да ја заврши војната, која трае веќе три години.
Трамп: Путин сонуваше да ја заземе цела Украина, нема да му дозволам
Американски претставници нагласија дека оваа недела ќе биде клучна во одлучувањето дали САД ќе продолжат да бидат вклучени во мировните преговори, токму кога незадоволството на Трамп расте.
На 28 април, Путин објави тридневен прекин на огнот од 8 до 11 мај по повод 80-годишнината од победата на Советскиот Сојуз над нацистичка Германија, потег што специјалниот пратеник на Трамп, Кит Келог, го нарече апсурден.
На прашањето дали му верува на Путин, Трамп избегна јасен одговор.
„Не им верувам на многу луѓе. Ниту вам не ви верувам. Путин сонуваше да ја заземе цела Украина. Не мислам дека ќе му дозволам да го стори тоа“,
заклучи Трамп.
Додека преговорите се во тек, руските сили ги засилија нападите во последните недели, вклучително и во Сумската Област. За време на претходното тридневно велигденско примирје во Русија, помеѓу 19 и 21 април, Зеленски ја обвини Москва за речиси 3 000 прекршувања на примирјето.