Додека Трамп беше на краток престој во „Мекдоналдс“, Камала Харис во неделата го прослави својот 60. роденден и ја посети црквата во близина на Атланта, Џорџија, каде што ги повика верниците да гласаат против „хаосот, стравот и омразата“, кои, како што додаде, се олицетворение на нејзиниот републикански ривал
Додека кампањата за претседателските избори во САД влегува во финишот, кандидатите на секој начин се обидуваат да му зададат удар на противникот, пишува Би-би-си на српски.
Така, Доналд Трамп, републиканскиот кандидат, ја „посоли“ кампањата продавајќи помфрит во синџирот ресторани за брза храна „Мекдоналдс“ во Пенсилванија.
За тоа време, неговата противкандидатка од Демократската партија, Камала Харис, беше во Џорџија и на социјалната мрежа Икс напиша: „Трамп е исцрпен, нестабилен и несоодветен да биде претседател на САД“.
Додека Трамп беше на краток престој во „Мекдоналдс“, Камала Харис во неделата го прослави својот 60. роденден и ја посети црквата во близина на Атланта, Џорџија, каде што ги повика верниците да гласаат против „хаосот, стравот и омразата“, кои, како што додаде, се олицетворение на нејзиниот републикански ривал.
Happy birthday, Kamala. Life only gets better and better with you. ❤️
— Doug Emhoff (@DouglasEmhoff) October 20, 2024
Kamala’s birthday wish is the same as four years ago: Vote early! pic.twitter.com/x6VrxclG2z
Во меѓувреме, милијардерот Илон Маск, кој го поддржува Трамп, почна да дава по еден милион долари дневно на гласачите кои ја потпишуваат неговата петиција за поддршка на Уставот на САД.
Гувернерот на Пенсилванија, Џош Шапиро, демократ, рече дека тоа е длабоко вознемирувачко и дека органите за спроведување на законот треба потенцијално да го разгледаат ова прашање.
„Сè што Трамп знае да направи е да лаже“
Трамп посети ресторан на „Мекдоналдс“ во Фестервил-Тревосе, предградие на Филаделфија, каде што научи како да прави помфрит потопувајќи ги компирите во врело масло и сервирајќи оброци на шалтер на луѓето кои возат до ресторанот.
За време на неговиот престој, ресторанот внатре бил затворен.
— Donald J. Trump (@realDonaldTrump) October 20, 2024
„Ја сакам оваа работа“,
рече републиканецот додавајќи дека сака „биг мек“ оброк и сендвичи со риба.
Но, не е само тоа.
Поранешниот претседател неколкупати ја обвини Камала Харис дека лажела оти работела во филијала на ресторан за брза храна во Калифорнија додека паралелно одела во средно училиште.
Трамп тврди дека Харис сето тоа го измислила, за што не нуди докази.
Додека служеше помфрит, Трамп во изјава за новинарите ја нарече својата противничка „лажливата Камала“.
„Сега работев (во ‘Мекдоналдс’) 15 минути подолго од Камала“,
рече тој.
Предизборниот штаб на Камала Харис одговори дека тоа е очајнички потег на Трамп и дека тој сè што знае да направи е да лаже.
„Тој не може да разбере како е да се има сезонска работа бидејќи му се дадени милиони на сребрен послужавник“,
изјави Иан Самс, портпарол на штабот на Камала Харис.
Од нејзиниот штаб велат дека таа работела на каса, на машина за сладолед и фритеза во „Мекдоналдс“ на Централната авенија во Аламеда, Калифорнија, летото 1983 година.
„Мекдоналдс“ објави локален средношколски годишник од 1983 година, со слики од неколку ученици кои работеле таму во тоа време.
Од Би-би-си разговарале со еден од учениците на фотографиите, кој рекол дека се сеќава на многу луѓе кои работеле со него во ресторанот пред повеќе од 40 години, но не се сеќава дека Камала Харис била една од нив.
Меѓутоа, новинари на „Њујорк тајмс“ разговарале со другарка на Камала Харис од средно училиште, Ванда Каган, која рекла дека се сеќава дека актуелната американска потпретседателка работела во „Мекдоналдс“ во тоа време.
Зошто Маск дели пари
Технолошкиот милијардер Илон Маск изјави дека ќе подарува по еден милион долари дневно на регистрираните гласачи во клучните американски држави до претседателските избори во САД на 5 ноември.
Победникот се избира по случаен избор меѓу оние кои ја потпишуваат уставната петиција што ја започна кампањата на Маск, „Америка ПАК“.
Маск ја основа групата за да го поддржи обидот на Трамп да се врати во Белата куќа.
Тој досега донирал 75 милиони долари за групата, која брзо стана централен играч во кампањата на Трамп.
„Групата ‘Америка ПАК’ е создадена со цел да ги поддржи основните вредности, како што се безбедни граници и градови, рационално трошење, праведен правосуден систем, слобода на говор и право на самоодбрана“,
се наведува на веб-страницата на групата.
Милијардерот рече дека сака да добие повеќе од еден милион, можеби два милиони гласачи во колебливите т.н. „свинг“ држави кои ќе потпишат петиција за поддршка на првиот и вториот амандман.
Трамп во неделата за време на изборната кампања изјави дека не го следел потегот на Маск додавајќи дека често разговара со него и дека тој е негов пријател.
Добитниците се избираат како на лотарија. Првиот чек од милион долари беше доделен на изненаден учесник на настан во градското собрание во Пенсилванија во саботата навечер. Во неделата беше доделен уште еден чек.
Маск во Пенсилванија им дава 100 долари на гласачите да ја потпишат петицијата, плус 100 долари за секој човек што ќе го упатат да се потпише.
Гласачите во другите колебливи држави добиваат 47 долари по препорака.
Демократите: „Тоа е длабоко вознемирувачко“
Во Соединетите Американски Држави незаконски е да се даваат пари на луѓето за да се охрабрат да гласаат на избори.
За Џош Шапиро, гувернерот на Пенсилванија, демократ кој ја поддржува Камала Харис, стратегијата на Маск е длабоко вознемирувачка.
Тој во изјава за Ен-би-си њуз рече дека органите за спроведување на законот треба потенцијално да ги следат плаќањата на Маск.
Рик Хејзен, експерт за изборно право, на својот блог за изборно право напиша дека понудата е очигледно незаконска.
Секој што „плаќа, нуди да плати или прифаќа плаќање за да гласа или да се регистрира за гласање“, се соочува со потенцијална парична казна од 10 000 долари или пет години затвор, според федералниот закон.
Иако Маск технички бара од гласачите да го потпишат формуларот, Хејнс ја доведува во прашање намерата на петицијата.
„Кој може да ја потпише петицијата? Само регистрирани гласачи во колебливите држави, што ги прави нелегални“,
додава професорот.
Секој што ќе потпише уставна петиција со која се обврзува дека ќе ја поддржи слободата на говорот и правото на оружје мора да обезбеди лични податоци, потенцијално дозволувајќи на групата „Америка ПАК“ да ги повика во врска со изборите.