Трамп вели дека Хамас мора да дејствува брзо или сите облози ќе бидат поништени
Американскиот претседател Доналд Трамп вели дека го цени тоа што Израел привремено го запре бомбардирањето за да му даде шанса на договорот за ослободување на заложниците.
Сепак, Трамп упати закана до милитантната палестинска организација Хамас поради реакцијата на неговиот мировен план за војната во Газа и повика на брза акција.
„Хамас мора да дејствува брзо, или сите облози ќе бидат поништени. Нема да толерирам одложување, за кое многумина мислат дека ќе се случи, или каков било исход каде што Газа повторно претставува закана. Ајде да го завршиме ова, брзо“,
напиша Трамп на својата платформа Трут соушал (Truth Social).
Оваа нова објава доаѓа откако Хамас вчеравечер прифати делови од мировниот план на Трамп – вклучително и ослободувањето на сите заложници – но побара понатамошни преговори.
Трамп претходно побара од Израел веднаш да престане со бомбардирањето на Појасот Газа за да се олесни ослободувањето на заложниците. Во својата денешна објава, тој нагласи дека го цени фактот што Израел привремено го запрел бомбардирањето.
Меѓутоа, според најновите извештаи од опколената енклава, Израел и денеска продолжил да напаѓа.
Министерството за здравство во Газа, управувано од Хамас, соопшти дека 66 лица се убиени во израелските воени операции на палестинската територија во последните 24 часа, со што вкупниот број жртви од почетокот на војната достигнал 67 074.
Според соопштението објавено на Телеграм, дополнителни 265 други лица се примени во болница со повреди.
„Голем број жртви остануваат под урнатините и на улиците бидејќи екипите на брзата помош и цивилната одбрана не можат да стигнат до нив во овој момент”,
се вели во објавата.
Портпаролката на ИДФ (Израелските одбранбени сили) подоцна изјави дека армијата официјално не објавила прекин на операциите.
И покрај ова, израелските медиуми објавија дека армијата во текот на изминатата ноќ добила инструкции да ја запре офанзивата за освојување на градот Газа.