„Сакаме да имаме само еден извор на аврторитет. Ние сме далеку пред Кина. Кина го знае тоа. И ако не го направиме овој чин, ќе ѝ го дадеме на Кина најголемиот подарок“, изјави американскиот претседател
Американскиот претседател Доналд Трамп вчера потпиша извршна наредба со која се обидува да ги запре сите закони што ја ограничуваат вештачката интелигенција и да ги спречи сојузните држави да ја регулираат брзорастечката технологија. Наредбата, исто така, предвидува формирање федерална работна група која ќе има „единствена одговорност“ за оспорување на законите за вештачка интелигенција на 50-те сојузни држави.
На церемонијата на потпишувањето, претседателот го пофали ентузијазмот на компаниите за вештачка интелигенција и нивните намери да инвестираат во Соединетите Држави. Во таа насока тој наведе дека ако за тоа треба да добијат 50 различни одобренија од 50 различни држави, не би можеле да ги остварат своите планови за инвестинирање.
„Сакаме да имаме само еден извор на аврторитет. Ние сме далеку пред Кина. Кина го знае тоа. И ако не го направиме овој чин, ќе ѝ го дадеме на Кина најголемиот подарок“,
изјави Трамп.
Текстот на извршната наредба, како што објасни шефот на кабинетот на Белата куќа, Вил Шарф, има за цел да „обезбеди само една рамка за функционирање на вештачката интелигенција, така што таа да не подлежи на законодавство на ниво на поединечни држави, што би можело да го парализира целиот сектор“.
Извршната наредба, теоретски, не може да биде над текстот гласан во Конгресот или во парламентите на секоја од американските сојузни држави, анализираат агенциите.
Досега, повеќе од сто закони се донесени во околу триесет држави, претежно демократски и републикански, за голем број аспекти поврзани со вештачката интелигенција, а бројни предлог-закони се поднесени до Конгресот, но ниту еден сè уште не е ставен на гласање.
Инаку, неколку часа по неговата инаугурација во јануари, Трамп ја поништи извршната наредба на неговиот претходник Џо Бајден во врска со прашањата поврзани со безбедноста на вештачката интелигенција.