Тој додава дека натамошните активности ќе се знаат за околу 24 часа
Американскиот претседател Доналд Трамп изјави дека американските воени бродови се преполнуваат со оружје за да го нападнат Иран ако преговорите во Пакистан не успеат да доведат до договор.
„Во тек е ресетирање. Ги полниме бродовите со најдобра муниција, најдоброто оружје некогаш произведено – дури и подобро од она што го направивме претходно и го разнесовме. И ако немаме договор, ќе ги користиме, и ќе ги користиме многу ефикасно“,
вели Трамп за „Њујорк пост“.
Тој додава дека натамошните активности ќе се знаат за околу 24 часа.
Претходно во објава на неговата мрежа Трут соушал, Трамп кратко напиша: „Најмоќното ресетирање во светот“.
Трамп зборуваше кратко откако потпретседателот Џеј-Ди Венс е на пат кон Исламабад, каде што ќе му се придружат специјалниот пратеник Стив Виткоф и зетот на Трамп, Џаред Кушнер, за да преговараат за конечен мир по двонеделното примирје постигнато во вторникот.
„Ќе дознаеме за околу 24 часа. Наскоро ќе знаеме“,
рече Трамп во телефонско интервју кога беше прашан дали мисли дека разговорите ќе бидат успешни.
Се очекува Иран да биде претставен во пакистанската престолнина од министерот за надворешни работи Абас Арагчи и претседателот на иранскиот парламент, Мохамед Багер Галибаф.
Се очекува разговорите да се фокусираат на барањата на САД Иран да предаде околу 500 килограми збогатен ураниум закопан длабоко и да го остави Ормускиот Теснец отворен за меѓународен сообраќај. Трамп јасно стави до знаење дека повторното отворање на Ормускиот Теснец од страна на Иран за слободен премин на бродови е клучна компонента на секој договор за прекин на огнот, иако малку бродови поминале низ него откако САД престанаа да го бомбардираат Иран.
Други клучни точки ќе бидат прекинувањето на поддршката на Иран за регионалните посредници, статусот на програмата за балистички ракети на земјата и барањето на Техеран за укинување на санкциите на САД.
Разговорите доаѓаат во време кога постојат закани да пропадне привременото примирје објавено оваа недела. Иран инсистира примирјето да вклучува крај на војната на Израел во Либан, додека Трамп и израелскиот премиер Бенјамин Нетанјаху тврдат дека Либан не е дел од договорот.