Според него, Индија ќе почне да ги укинува царините за американски стоки и ќе купи американски производи во вредност од 500 милијарди долари
Моди, пак, на Икс напиша дека е воодушевен од најавата за намалување на американските царини за индиски стоки. Посочи и дека лидерството на Трамп е од витално значење за глобалниот мир, стабилноста и просперитетот
Американскиот претседател Доналд Трамп објави трговски договор за намалување на дополнителните царини за стоки увезени од Индија од 25 отсто на 18 отсто откако нејзиниот премиер Нарендра Моди му вети дека повеќе нема да купува руска нафта. Одлуката е објавена по телефонски разговор меѓу Трамп и Моди.
Инаку, Трамп со месеци врши притисок врз Индија да ја прекине нејзината зависност од евтина нафта од Русија. Владата во Њу Делхи го искористи падот на цената на руската нафта бидејќи голем дел од светот ја изолира Москва поради нејзината војна против Украина.
Трамп, исто така, рече дека Индија ќе почне да ги укинува царините за американски стоки и ќе купи американски производи во вредност од 500 милијарди долари.
„Тоа ќе помогне да се стави крај на војната во Украина, која се случува токму сега, каде што илјадници луѓе умираат секоја недела“,
напиша Трамп на Трут соушл.
Моди, пак, на Икс напиша дека е воодушевен од најавата за намалување на американските царини за индиски стоки. Посочи и дека лидерството на Трамп е од витално значење за глобалниот мир, стабилноста и просперитетот.
„Се радувам на тесната соработка, со цел да го подигнеме нашето партнерство“,
рече тој.
Трамп имаше срдечни односи со Моди, кои се влошија поради трговските спорови.
Во јуни САД објавија царини од 25 отсто за целиот увоз од Индија откако администрацијата на Трамп изјави дека владата во Њу Делхи направила премалку за да го намали трговскиот суфицит со САД и да го отвори својот пазар за американски стоки.
Потоа во август Трамп додаде уште 25 отсто царини бидејќи Индија купува руска нафта. Ова ја зголеми вкупната царинска давачка за увезената индиска стока на 50 отсто.
Индија ја искористи можноста да заштеди купувајќи евтина руска нафта од почетокот на војната во Украина, а Москва, пак, за да ја поткрепи својата економија оптоварена со санкции.
Неодамна Европската Унија и Индија потпишаа договор за слободна трговија.