Трамп вчера изјави дека ја исклучил можноста за испраќање американски трупи во Украина, но дека САД би можеле да обезбедат воздушна поддршка како дел од договорот за ставање крај на војната, без да прецизира каква
Еден ден откако американскиот претседател Доналд Трамп вети безбедносни гаранции за Украина на вонредниот самит во Белата куќа во понеделникот за да помогне во ставањето крај на војната, патот кон мирот останува неизвесен додека Соединетите Американски Држави (САД) и сојузниците се подготвуваат да разработат што може да вклучува воена поддршка за Украина.
Трамп вчера изјави дека ја исклучил можноста за испраќање американски трупи во Украина, но дека САД би можеле да обезбедат воздушна поддршка како дел од договорот за ставање крај на војната.
Американскиот претседател не даде подетални информации, но подоцна во интервју со радиоводителот Марк Левин, Трамп го окарактеризира својот стил на преговори во обидот да се стави крај на војната како „веројатно повеќе инстинкт, отколку процес“.
Трамп призна дека рускиот претседател Владимир Путин можеби сепак нема да сака да склучи договор велејќи – „Ќе откриеме што се случува со претседателот Путин во следните неколку недели“.
Природата на американската воена помош за Украина според потенцијалниот мировен договор останува нејасна. Воздушната поддршка може да има многу форми, како што се системи за ракетна одбрана или борбени авиони што спроведуваат зона на забрането летање.
Портпаролката на Белата куќа, Каролин Ливит, потврди дека воздушната поддршка од САД е опција и можност, но и таа не даде никакви детали.
„Претседателот дефинитивно изјави дека американска чизма нема да биде на терен во Украина, но ние сигурно можеме да помогнеме во координацијата и можеби да обезбедиме други средства за безбедносни гаранции за нашите европски сојузници“,
изјави таа на прес-конференција.
Пред самитот во Вашингтон во понеделник, Русија, која честопати изјавуваше дека се согласува со идејата за безбедносни гаранции за Киев, го повтори својот долгогодишен став дека категорично ги отфрла сите сценарија што вклучуваат распоредување на трупи на НАТО во Украина.
Некои аналитичари сметаат дека повеќе од еден милион луѓе се убиени или ранети во конфликтот, кој започна со руската инвазија на Украина во февруари 2022 година.