Последниот целосен нуклеарен тест на САД, со кодно име „Дивајдер“, беше спроведен на 23 септември 1992 година на локацијата што сега се нарекува Национален безбедносен објект во Невада
Американскиот претседател Доналд Трамп му наложи на Пентагон веднаш да почне со тестирање на нуклеарното оружје за да можат САД да држат чекор со другите нуклеарни сили, притоа директно наведувајќи ги Русија и Кина.
За ваквата одлука Трамп информира во објава на неговата социјална платфрома Трут соушл (Truth Social), посочувајќи дека овој процес ќе започне веднаш.
„Поради програмите за тестирање на другите земји, му наложив на Министерството за војна да започне со тестирање на нашето нуклеарно оружје на рамноправна основа. Тој процес ќе започне веднаш“,
напиша американскиот претседател.
Објавата, како што пренесува „Гардијан“, дошла помалку од еден час пред денешната средба на Трамп со кинескиот претседател Си Ѓинпинг во Јужна Кореја, каде двајцата разговараа за смирување на тензиите во трговската војна. Инаку, ова беше прва средба на Трамп и Си од 2019 година.
Што се однесува до наредбата до Пентагон, Соединетите Американски Држави последен пат изведоа целосен тест на нуклеарно оружје во 1992 година. Од друга страна, не е познато дека Кина и Русија извршиле такви тестирања во истиот период.
Референцата на Трамп „на рамноправна основа“, според „Гардијан“, предизвикува нејаснотии и го отвора прашањето какви тестирања на оружје би можеле да извршат САД или дали американскиот претседател сака да ја демонстрира својата воена моќ, на сличен начин како што тоа го направи Русија неодамна.
Инаку, од 1998 година досега, ниту една земја освен Северна Кореја, според потврдени информации, не спровела целосен нуклеарен тест. Сепак, земјите кои располагаат со нуклеарно оружје, како што се САД, последователно извршија симулирани нуклеарни експлозии користејќи моќни компјутери, како и поврзани експерименти со нуклеарна физика, тестови на нуклеарни ракети, механизми за боеви глави и „супкритични“ тестови на нуклеарни материјали за да се осигурат дека нивните арсенали остануваат одржливи.
Од Пентагон засега не одговориле на прашањата од медиумите во врска со објавата на Трамп.
Говорејќи со новинарите во претседателскиот авион „Ер форс уан“ (Air Force One) по средбата со Си, Трамп во врска со ова прашање рече дека „би сакал да види“ денуклеаризација, додавајќи дека САД „разговараат со Русија за тоа“.
„И Кина ќе биде додадена на тоа ако направиме нешто“,
рекол тој, без да образложи.
Во меѓувреме, денеска, кинеското Министерство за надворешни работи на редовната прес-конференција изјави дека Пекинг се надева оти САД ќе го почитуваат договорот за неширење на нуклеарното оружје оружје „и ќе преземат активности што придонесуваат за регионалниот мир, а не спротивното“.
„Би сакале да нагласиме дека Кина останува посветена на патот на мирен развој, водејќи одбранбени политики за национална безбедност и пријателски дипломатски политики“,
рече портпаролот Гуо Џиакун.
За потсетување, рускиот претседател Владимир Путин во неделата изјави дека Русија успешно ја тестирала својата „уникатна“ крстосувачка ракета „Буревестник“ на нуклеарен погон, која може да носи нуклеарна боева глава. Кремљ го опиша тоа како дел од напорите за „осигурување на националната безбедност на земјата“.
Изјавата на Путин, американскиот претседател ја оцени како несоодветна, додека Сергеј Рјабков, близок соработник на Путин, за руските медиуми изјави дека Москва однапред ги известила САД за тестот.
Инаку, тестирањето на „Буревестник“ од страна на Русија доаѓа во време на засилена воинствена реторика од Кремљ, во која се споменува и нуклеарно оружје и прекин на разговорите меѓу САД и Русија околу војната во Украина.
Путин вчера изјави дека руските сили извршиле тест на супер торпедо „Посејдон“, исто така, на нуклеарен погон, за кое воените аналитичари велат дека е способно да ги уништи крајбрежните региони бидејќи носи нуклеарна боева глава, чија експлозија може да предизвика огромни радиоактивни океански бранови што би ги поплавиле и контаминирале градовите.
Трамп во објавата на Трут соушл наведува и дека САД имаат повеќе нуклеарно оружје од која било друга земја, дека Русија е втора, а Кина далеку на третото место, тврдење што го повтори и на прес-конференција во „Ер форс уан“.
Сепак, ваквите наводи на Трамп не кореспондираат целосно со потврдените бројки. Имено, според Меѓународната кампања за укинување на нуклеарното оружје, во моментов Русија има најголем нуклеарен арсенал, со повеќе од 5 500 нуклеарни боеви глави, додека САД имаат 5 044.
Последниот целосен нуклеарен тест на САД, со кодно име „Дивајдер“, беше спроведен на 23 септември 1992 година на локацијата што сега се нарекува Национален безбедносен објект во Невада. Тогашниот претседател, Џорџ Буш Постариот, објави мораториум за подземни нуклеарни тестирања истата година. Сепак, САД сè уште имаат можност да ги продолжат тестовите во Националниот безбедносен објект во Невада.
Објавата на Трамп предизвика реакции на негодување меѓу политичкото милје во Вашингтон, особено меѓу демократите.
„Апсолутно не. Ќе воведам закон за да се запре ова“,
напиша конгресменката од Невада од редовите на демократите, Дина Титус, на платформата Икс, како одговор на објавата на Трамп.
Иако и Москва и Вашингтон постојано наведуваат дека се залагаат за запирање на трката во вооружување, досега е постигнат мал напредок. Кремљ неодамна го критикуваше притисокот на Трамп за развој на ракетен штит, познат како Златна купола, за кој американскиот претседател тврди дека ќе ги направи САД отпорни на напади.
За време на неговиот прв мандат, Трамп наводно се обидел да го зголеми американскиот нуклеарен арсенал „десеткратно“.
„Соединетите Американски Држави мора значително да го зајакнат и прошират својот нуклеарен капацитет сè додека светот не се освести во врска со нуклеарното оружје“,
напиша тој на Твитер во декември 2016 година.