Од земјите од регионот, со царинска стапка од 15 проценти ќе бидат и Хрватска и Словенија, производите од Србија ќе се царинат со 35 отсто, од Босна и Херцеговина со 30 отсто. Најниска царина ќе има Црна Гора – 10 отсто
Со новата извршна наредба што синоќа ја потпиша американскиот претседател Доналд Трамп за воведување царини речиси за сите земји што досега немаат трговски договор со Соединетите Американски Држави (САД), царинската стапка за Македонија од претходните 33 отсто е намалена на 15 отсто.
Од земјите од регионот, со царинска стапка од 15 проценти ќе бидат и Хрватска и Словенија, производите од Србија ќе се царинат со 35 отсто, од Босна и Херцеговина со 30 отсто. Најниска царина ќе има Црна Гора – 10 отсто. Царинската стапка од 10 отсто ќе има и Албанија.
Оние земји што не се наоѓаат на списокот, наречен од Белата куќа како Анекс 1, ќе се царинат со 10 отсто.
Од европските земји, најсилно е погодена Швајцарија, со стапка од 39 отсто.
Од позначајните трговски партнери со САД, Канада доби царинска стапка од 35 отсто, Тајван од 20 отсто, Израел од 15 отсто, Јужна Африка од 30 отсто, Венецуела од 15 отсто, економиите од југоисточна Азија, како Камбоџа, Малезија и Тајланд добија 19 отсто, додека Лаос и Мјанмар – 40 отсто.
Царина од 15 отсто САД ќе имаат и со Европската Унија, со која склучија трговски договор на 27 јули годинава.
Трамп на почетокот на април годинава, првично објави царинска стапка за македонските производи од 33 отсто.
Потоа, тој во два наврати ги одложуваше царините, повикувајќи ги сите држави на преговори.
Со неодамнешната одлука земјава ги укина царините за увоз на производи од САД и ги намали царинските стапки за 67 стоки, претежно суровини и репроматеријали што се користат во домашната индустрија.
Законските измени, на предлог на министерката за финансии Гордана Димитриеска-Кочоска, беа усвоени во Собранието на 24 јуни, а стапија во сила на 1 јули годинава.
Од Владата изминатиот период изјавуваа дека се водат преговори со претставници на американската администрација за тоа земјава да добие колку што може поповолна царинска стапка што треба да важи од 1 август.
Со новата извршна наредба на американскиот претседател се воведуваат нови царини од 10 до 50 отсто за речиси сите трговски партнери на САД.
Новите американски царини ќе стапат на сила на 7 август, а не на 1 август, со цел да се обезбеди повеќе време за нивно спроведување.