Американскиот претседател наведува дека побарал од државниот секретар Марко Рубио, директорот на ЦИА, Џон Ретклиф, советникот за национална безбедност, Мајкл Валц, и амбасадорот и специјален пратеник Стив Виткоф да ги водат преговорите кои, како што додава, силно чувствува дека ќе бидат успешни
Американскиот претседател Доналд Трамп на својата социјална мрежа Трут соушл (Truth Social) објави дека денеска имал долг и многу продуктивен телефонски разговор со неговиот руски колега Владимир Путин, во кој, меѓу другото, се согласиле „веднаш“ да започнат со мировни преговори за Украина.
Во објавата, Трамп вели дека со рускиот претседател разговарале за Украина, Блискиот Исток, енергијата, вештачката интелигенција, моќта на доларот и на разни други теми.
„И двајцата се навративме на големата историја на нашите народи и за фактот дека толку успешно се боревме заедно во Втората светска војна, сеќавајќи се дека Русија изгуби десетици милиони луѓе, а и ние, исто така, изгубивме многу! Секој од нас зборуваше за силните страни на нашите нации и за големите придобивки што некој ден би ги имале од меѓусебната соработка“,
вели американскиот претседател.
Но, прво, како што вели понатаму во објавата, и двајцата се согласиле дека сакаат да стават крај на милионите загубени животи како резултат на војната меѓу Русија и Украина.
Во таа насока, Трамп се пофали дека во разговорот Путин го искористил предизборното мото на американскиот претседател – „здрав разум“, додавајќи дека и двајцата силно веруваат во тоа.
Вели, се договориле на заедничка и тесна соработка, која, како што пишува, вклучува и заемни посети на двете земји.
Според Трамп, тој и Путин се согласиле да ги упатат своите тимови веднаш да започнат разговори за ставање крај на војната во Украина.
„Ќе започнеме со тоа што ќе го повикаме претседателот Зеленски, од Украина, за да го информираме за разговорот, нешто што ќе го направам во моментов“,
вели Трамп.
Американскиот претседател наведува дека побарал од државниот секретар Марко Рубио, директорот на ЦИА, Џон Ретклиф, советникот за национална безбедност, Мајкл Валц, и амбасадорот и специјален пратеник Стив Виткоф да ги водат преговорите кои, како што додава, силно чувствува дека ќе бидат успешни.
„Милиони луѓе загинаа во војна што немаше да се случи да бев претседател, но се случи, па мора да заврши. Повеќе не треба да се губат животи! Сакам да му се заблагодарам на претседателот Путин за одвоеното време и напор во врска со овој повик, и за вчерашното ослободување на Марк Фогел, прекрасен човек што јас лично го поздравив синоќа во Белата куќа. Верувам дека овој напор ќе доведе до успешен исход, се надевам наскоро!“,
пишува Трамп на крајот од објавата за телефонскиот разговор со Путин.