Сепак, посетата на Трамп на Велика Британија не поминува незабележително во тамошната јавност. Таа е проследена со протести против неговото доаѓање, но и инциденти, кои се случија во околината на замокот „Винздор“. Токму пред неговото доаѓање, британски активисти развија огромен транспарент со фотографија од него и починатиот сексуален престапник Џефри Епстајн на една од кулите на замокот. Потоа се појавија и проекции од слики од нив двајца, но и со принцот Ендрју
Претседателот Доналд Трамп и првата дама Меланија Трамп синоќа пристигнаа на аеродромот „Стенсед“ во Лондон во тридневна државна посета на Велика Британија, која се очекува да биде проследена со кралски свечености, но и со разговори за трговската и меѓународната политика, пренесува Би-би-си.
Откако се симнаа од претседателскиот авион „Ер форс уан“, претседателот и првата дама се пречекани од шефицата на протоколот на САД, Моника Кроули, британската министерка за надворешни работи Ивет Купер, а во име на кралот, претседателската двојка ја поздрави и виконтот Худ.
Ова е втора државна посета на Трамп на Велика Британија. Првата се одржа во 2019 година, за време на неговиот прв претседателски мандат. Тогаш тој и беше гостин на кралицата Елизабета Втора, а сега негов домаќин ќе биде нејзиниот син, кралот Чарлс Трети.
Сепак, посетата на Трамп на Велика Британија не поминува незабележително во тамошната јавност. Таа е проследена со протести против неговото доаѓање, но и инциденти, кои се случија во околината на замокот „Винздор“. Токму пред неговото доаѓање, британски активисти развија огромен транспарент со фотографија од него и починатиот сексуален престапник Џефри Епстајн на една од кулите на замокот. Потоа се појавија и проекции од слики од нив двајца, но и со принцот Ендрју.
Поради тоа, како што соопштија од полицијата, четири лица се уапсени под сомнение за злонамерна комуникација по неовластено снимање во замокот „Виндзор“.
„Нашите полицајци брзо реагираа по што четири лица се уапсени. Спроведуваме темелна истрага за околностите на овој инцидент и ќе дадеме дополнителни информации кога ќе бидеме во можност“,
соопшти полицијата.
Пред да замине за Лондон, Трамп испрати позитивни сигнали за посетата опишувајќи ја како голема чест и додавајќи дека неговиот однос со Велика Британија е многу добар.
Според него, главната цел на посетата е да се сретне, како што рече, со неговиот пријател кралот Чарлс.
Трамп ќе престојува во замокот „Виндзор“, каде што ќе биде пречекан од кралот и кралицата заедно со другите членови на кралското семејство. Програмата вклучува воена парада и други различни свечености.
Утре е планирана средба со британскиот премиер Кир Стармер во резиденцијата „Чекерс“, по што ќе следи нивна заедничка прес-конференција.