Предоцна е, гласањето е веќе почнато, кажа Трамп кој го одби повикот на Харис за уште еден ТВ-дуел пред изборите во САД
Поранешниот американски претседател и републикански кандидат на претстојните избори во САД, Доналд Трамп вели дека е доцна за уште една претседателска дебата. Тој го одби повикот на неговата противкандидатка од Демократската партија, Камала Харис со образложение дека гласањето веќе започнало.
„Јас имав две дебати, таа имаше една. Проблемот со друга дебата е што веќе е предоцна, гласањето е почнато“,
порача Трамп.
Пораката Трамп ја испрати пред своите поддржувачи на митинг во Вилмингтон , Северна Каролина.
Претходно, американската потпретседателка и кандидатка за претседател на САД од Демократската партија, Камала Харис, ја прифати поканата на Си-ен-ен да учествува на дебата со републиканскиот противкандидат Доналд Трамп на 23 октомври. Информацијата ја потврдија од нејзиниот изборен штаб, а Харис на платформата Икс напиша дека очекува и Трамп да ѝ се придружи во ТВ-дуелот.
Првиот ТВ дуел на кандидатите за претседател на САД се одржа во јуни кога на дебатата учествуваше Трамп со актуелниот американски претседател Џо Бјаден, кој подоцна се повлече од трката.
Првата дебата меѓу Трамп и Харис се одржа на 10 септември. По дуелот Трамп порача дека нема да учествува во уште една дебата пред изборите закажани за 5 ноември.