Официјален претставник на Белата куќа, како што пишува Ројтерс, изјавил дека планот на САД повикува на враќање на сите заложници, и живите и мртвите, да нема понатамошни израелски напади врз Катар и нов дијалог меѓу Израел и Палестинците за мирен соживот
Американскиот претседател Доналд Трамп вели дека е блиску до постигнување договор за завршување на војната во Појасот Газа и за враќање на заложниците кои ги држи Хамас.
„Изгледа дека имаме договор за Газа. Мислам дека тоа е договор што ги враќа заложниците, тоа ќе биде договор што ќе ја заврши војната“,
рече Трамп денеска пред новинарите.
Тој не понуди детали и не даде распоред.
Висок функционер на Белата куќа за Ројтерс изјави дека Трамп ќе се сретне со Нетанјаху в понеделник во Белата куќа со цел да се постигне рамка за договор.
САД претходно претставија мировен план со 21 точка за Блискиот Исток, чија цел е да се стави крај на речиси двегодишниот конфликт меѓу Израел и Хамас. Планот беше објавен во време на општополитичките дебати на 80. сесија на Генералното собрание на ОН во Њујорк, на кои учествуваа светските лидери.
Според специјалниот претставник на САД, Стив Виткоф, предлогот во вторникот е испратен до претставници од Саудиска Арабија, ОАЕ, Катар, Египет, Јордан, Турција, Индонезија и Пакистан.
Официјален претставник на Белата куќа, како што пишува Ројтерс, изјавил дека планот на САД повикува на враќање на сите заложници, и живите и мртвите, да нема понатамошни израелски напади врз Катар и нов дијалог меѓу Израел и Палестинците за мирен соживот.
Трамп, кој останува најцврст сојузник на Израел на меѓународната сцена, денеска изјави дека разговарал со претставници на блискоисточните земји, како и со израелскиот премиер Бенјамин Нетанјаху.