Лидерот на ВМРО-ДПМНЕ потврди дека поранешниот скопски градоначалник е еден од потенцијалните кандидати, чиј рејтинг се проверува преку анкети, но додаде и дека има и други можни кандидати кои, според него, лесно би го победиле Шилегов
Претходниот градоначалник на Скопје во два мандата, Коце Трајановски, повторно е во игра за противкандидат, најверојатно, на Петре Шилегов од СДСМ во трката за главниот град, на претстојните локални избори.
Лидерот на ВМРО-ДПМНЕ Христијан Мицкоски денеска, одговарајќи на новинарско прашање, потврди дека Трајановски е еден од потенцијалните кандидати за градоначалник на Скопје, чиј рејтинг се проверува преку внатрепартиски анкети. Но додаде и дека има и други можни кандидати кои, според него, лесно би го победиле Шилегов.
Трајановски пред да стане градоначалник на Скопје беше градоначалник на Општина Гази Баба, а на претходните локални избори во 2017 година не успеа да извојува трет мандат на чело на главниот град, затоа што беше поразен од Шилегов.
Трајановски вчера говореше на партиска трибина во Гази Баба, каде што рече дека со СДСМ на власт општините и јавните претпријатија тонат во долгови, а ВМРО-ДПМНЕ се грижи за општественото добро и ќе изгради силни и развиени европски општини.
Мицкоски најави дека следната недела, по седница на Извршниот комитет на партијата, ВМРО-ДПМНЕ ќе објави и имињата на петнаесетина кандидати за градоначалници во општините во земјава, при што посочи дека, главно, станува збор за сосема нови имиња, кои досега не биле на функција во единиците на локалната самоуправа во која живеат. Тој рече дека станува збор за сериозни кандидати со кои очекува победа над кандидатите на СДСМ во тие општини.
Според Мицкоски, ВМРО-ДПМНЕ е фаворит за претстојните избори, а СДСМ, како што оцени, може да победи само ако ги наполни кутиите.
Тој рече дека се разговара со партии од албанскиот блок, но и со партии на другите заедници, за соработка на локалните избори и посочи дека наскоро ќе се знае кој се ќе застане зад кандидатите на ВМРО-ДПМНЕ.