Трајанов очекува во текот на следните 15 дена Комисијата за политички систем и односи со заедниците да започне расправа по предлог-законот, кој веќе е во парламентарна постапка
Претседателот на Демократскиот сојуз и пратеник Павле Трајанов денеска во Собранието имаше средба со координаторот на пратеничката група на ВМРО-ДПМНЕ, Никола Мицевски и пратеникот и претседател на Комисијата за надворешна политика Антонијо Милошоски, на која, како што информираше Трајанов, ги презентирал ставовите на Демократскиот сојуз во врска со реформите на изборните правила, кои според него треба да се одвиваат во три фази.
Во првата фаза, според Трајанов, треба да се донесат измените на Изборниот законик, со што Северна Македонија ќе биде една изборна единица и без изборен праг; во втората фаза, да се направат поцелосни реформи на изборните правила, со кои ќе се отстранат системските предности на четирите партии, посебно во врска со медиумското претставување и финансирање на изборната кампања од Буџетот на државата; и во третата фаза, уставни промени со кои ќе се намали бројот на пратеници од 120 на 90.
Прашан до кога треба да се донесат измените на Изборниот законик, Трајанов рече дека очекува во текот на следните 15 дена Комисијата за политички систем и односи со заедниците да започне расправа по предлог-законот, кој веќе е во парламентарна постапка.
„Цврсто стоиме на ставот дека треба да се променат изборните правила, затоа што навистина парламентот ќе биде одраз на реалната определба на граѓаните, а не како досега“,
изјави Трајанов.
За да се донесе законот, посочи Трајанов, треба да гласаат мнозинството пратеници и дека такво мнозинство сега, според искажаните определби на повеќе партии има.
„Најавивме разговор и со ДУИ и со Али Ахмети и претставниците од другите партии, доколку се подготвени да разговараме, но сакам да се отвори расправата во парламентот, да помине тоа на седница и ќе предложам да се одржи јавна расправа, на која ќе го поканиме сите парламентарни и вонпарламентарни партии, ОБСЕ, ОДИХР, ЕУ и експерти од НВО за да ги видиме нивните аргументи, кои се за, а кои се против за измените во изборната регулатива“,
изјави Трајанов.
Трајанов, исто така, повтори дека Демократскиот сојуз е апсолутно за укинување на пржинската влада бидејќи таа, како што нагласи, е надвор од уставниот систем и нагласи дека за нив е прифатливо само 20 дена експертска влада, на предлог на претседателот на државата.
„Важно е дека нема потреба од пржинска влада. Тоа го поддржуваме и ако законот стигне во парламентот јас како пратеник од ДС ќе гласам за такви промени“,
изјави Трајанов.