Инцидентот се случил кога возачите на два автобуси со босански регистарски таблички застанале за одмор во Овчар Бања, а патниците туристи излегле да се прошетаат по висечкиот мост на реката Западна Морава во близина на ресторанот „Дом“ кога тој пукнал
Во Овчар Бања, во близина на српскиот град Чачак, денеска пукна и се урна висечки пешачки мост на реката Западна Морава. Во несреќата загинаа две жени, а 11 лица се хоспитализирани во општата болница во Чачак, јави дописникот на МИА од Белград.
Инцидентот се случил кога возачите на два автобуси со босански регистарски таблички застанале за одмор во Овчар Бања, а патниците туристи излегле да се прошетаат по висечкиот мост на реката Западна Морава во близина на ресторанот „Дом“ кога тој пукнал.
„Под оптоварувањето се скина сајлата и сите патници паднаа во вода. Пожарникарите, спасувачите и екипите на Итната помош се на терен, луѓето се извлекуваат од водата. Повредените се транспортираат во Општата болница во Чачак. Повеќе од 50 луѓе паднаа во водата, се прават максимални напори сите луѓе што поскоро да се извлечат“,
соопштија српските медиуми.
Спасувачките екипи со чамци сè уште ја пребаруваат реката. На терен се и полицијата, брзата помош и пожарникарите.
Станува збор за патници од автобусот од Зворник кој застанал во Овчарско-кабларската Клисура.