Тој потврди дека останува најавата за официјален старт на „Безбеден град“ од 1 февруари, но потврди и дека примената на системот ќе се пролонгира доколку Собранието не даде поддршка на Законот за прекршоци
За околу 20 проценти е намален бројот на пациенти што се донесени на Клиниката за трауматологија како последица од сообраќајна незгода, вели министерот за внатрешни работи Панче Тошковски поврзувајќи ги овие податоци со воведувањето на пробниот период од „Безбеден град“.
Според него, во пробниот период на примената на системот од 15 дена во Скопје, граѓаните покажале дека можат да бидат поинакви учесници при управувањето на возилата.
„Денеска добив информации од директорот на Клиниката за трауматологија, каде што се примаат пациенти од посериозни сообраќајни незгоди од цела Македонија. Бројките се намалени особено во Скопје. Согласно бројките што ги добив, намален е за 20 проценти бројот на пациенти кои се задржуваат поради тешка телесна повреда, а за 15 до 20 проценти е намален бројот на пациенти што се донесени на таа клиника како последица од сообраќајна незгода“,
изјави Тошковски во вечерашното гостување во „Само интервју“ на телевизија Канал 5.
Тој потврди дека останува најавата за официјален старт на „Безбеден град“ од 1 февруари, како што рече, „согласно она што го имаат досега како фидбек и процедурата што треба да помине за уште два закона, односно да се изменат Законот за прекршоци и Кривичниот законик“.
„За измените на Законот за прекршоци, којшто е во втора фаза во Собранието, потребно е двотретинско мнозинство, а за Кривичниот законик просто мнозинство. Се надевам дека сериозноста на ова ќе биде препознаена од сите пратеници и ќе дадат поддршка за да може да почне примена на овој круцијален проект“,
рече Тошковски.
Тој потврди дека примената на системот ќе се пролонгира доколку Собранието не даде поддршка на Законот за прекршоци.
„Верувам дека овој закон би требало да го поддржат сите пратеници. Целта е спасување човечки животи“,
кажа Тошковски.
Според Тошковски, техничките проблеми во системот што се детектирани во пробниот период ќе бидат надминати до 1 февруари.
Во однос на дозволеното пречекорување на брзината, Тошковски рече дека ќе се утврди со подзаконски акти согласно европските параметри кои се движат од три до десет над дозволеното.
Исто така, рече дека со граѓаните ќе бидат споделени локациите на кои ќе има камери бидејќи, како што рече, крајната цел е да се намали брзината на движење во насока на помалку жртви и повредени во сообраќајки.
„Се ревидираат и знаците. Секаде каде што има камера за констатирање зголемена брзина задолжително ќе биде ревидиран знакот согласно важечки сообраќаен проект“,
рече Тошковски.
За видеозаписите од прекршоците рече дека ќе се чуваат во временски период утврден согласно законите во рамки на истражните дејствија, како и дека МВР ќе пушти во употреба апликација на која граѓаните ќе добиваат информации за сторени прекршоци.